Euro 2020-a cardiac arrest vanga mulchhunga thichhawnga a awm hnuah Christian Eriksen chu dam tha leh tawhin, a ram Denmark tana khel tura koh a ni.

Playmaker kum 30 mi Eriksen hi, Finland nena an inkhelh laiin cardiac arrest vangin nikhaw hre lovin mualchhungah a tlu a, rei tak an buaipui hnuah hmanhmawh takin hospital an pan pui a nih kha, a taksaah pacemaker ang deuh implanted cardioverter-defibrillator (ICD) vuahin hun rei tak hun a hmang. Tunah chuan a natna atangin a dam tha leh tawh a, Inter Milan lamin an chhuah hnuah January thla khan Brentford a zawm leh tawh bawk. 

March ni 26 hian Netherland nen friendly an khel dawn a, hemi hnu nithumah Serbia nen an khel leh ang. He game hnih khel tur hian Eriksen-a hian Spain lamah a team-mate te training a zawm tawh a ni. 

Inter Milan lamin an chhuah hnuah thla ruk atan Brentford a zawm a, thla hmasa February ni 26 khan Bees tan hian substitute lamah thuin a inlan ve thei tan a, hemi tum hian Newcastle United an hneh nghe nghe. Tottenham Hotspur midfielder hlui hi minute 52-ah lut vein fans leh player ten ding chungin an lawmpuina an lantir nghe nghe a ni. 

Inter Milan leh Eriksen hian December thla khan inremna neiin contract neih mek chu an titawp a, achhan chu ICD vuah mek a nih vangin Serie A lamah a inlan thei lo a ni. Serie A club a chhuahsan hnuin Odense Boldklub lamah training neiin Brentford lama a sign hma hian Danish rawlthar team ho bulah training a nei leh phawt a ni. Newcastle nena an inkhleh hnu hian Eriksen hian Brentford tan game puitling tum hnih a khel leh tawh a, hemi tum hian Norwich City leh Burnley an hmachhawn a ni. 

Denmark hi 2022 World Cup, Qatar khelh turin an tling tawh a, game 10 khelhah point 27 hmuin group hmahruaitu an ni a, pahnihna Scotland aiin point 4-in an sang zawk bawk.