Sawrkar tha ‘Good Governance’ a pawimawh thu sawi a ni fo thin, langtlang 'transparency' awm a tul zia sawi a ni fo thin. Hmasawnna mipui hrilhhriat a tul a, hemi hrul hian Sawrkar Department thenkhat chuan hotu thenkhat chinah an hna nihphung an inhriat pawh tawn a tul a; hna nihphung ena insi chawta invuan awm tak department te pawh a awm a ni. Mipuiin Sawrkara hriat duh a neih te chu hrilhhriat chanvo an neih angin Right to Information hmangin an duh ang an dil chhuak thei tawh a, hei hian Sawrkara dik lo awm a siamtha thin a, a dik hlel awm thei te pawh a veng thei bawk a ni. Heng hmanruate hian nasa takin ram a veng tih hairual a ni lo. Media pawhin chanchinthar hnar atan RTI Act hi an chelek fo a, a bul ber erawh a tha zawk duhna vang a ni tih hriattlan a tha awm e. Hetih rual hian department thenkhat thawhho that ngai, hemi kawnga duhthusam pha chiah lo an awm niin a lang foa, social media leh media dangah pawh hemi boruak hian hlet a chhuah lek lek chang a awmin a lang thei a ni. Tam tak chu Central programme rawn duan te a ni foa, project lian tham te pawh a awm thei bawk ang. Department te hian chan nei vek mahse society thlira department dang nena engemaw chen inkhawih pawlh ngai a awm lo thei lova, thawhhona ngai ngawih ngawih a awm changa an hlawhchham a nih chuan mipui chhiahhlawh, mipui rawngbawl an nihna thui tak an hloh tihna a ni ang. A hlawhchham chhan hi chu thil tam tak a ni thei a, hotu thenkhat zingah department awmna 'mono oriented' lutuka rilru put vang a ni thei a, thil thar chhuak inzir tum lem lo, hmasawn pawh tum lo hawi zau loh vang pawh a ni thei ang. Inthik emaw initsikna vang te pawh a ni thei mahna. Hnathawkte an in enlet fo a tula, mipui a chhe zawnga tawrh tirtu an ni thei tih inhriat a tula, hna hmuh ang chu tha taka thawh mai tur a ni. Tunlaiah thalai lehkha zir sang leh thiamna nei sang an tam tawh a, heng mite hian 'hmasawn an tum loh chuan kan lo thlak tawh ang e' tih rilru an pu thei tih hriat te pawh a tha ang. Sawrkar hnathawk te hi lehlamah chuan mipui 'mass' kan tih zinga mi an ni tho mai a, inzir duh mahse thenkhat chu hun awm loh vanga inzir tha hman lo an ni thei a. Awareness hi media lamah tunaia tan lak a ngai niin a lang a. Chumi piah lamah Department inkara thawhhona a awm that theih nan tunai hian hna inkhawih pawlh ngai ang chi hi department hotu thenkhat te kohkhawm zin bakah khauh zawka kaihhruaina inhrilh hriat kan mamawhin a lang a ni. Department te an thawk ho thei hlawl lo tihna nilovin tun dinhmun aia thawhhona awm theih nan kawng dap tlan a pawimawh a, ram hnuk khawih a ni chiang si a. Hmasawnna awm ang ang mipuiin hria pawh nise department te thawhhona a that loh chuan hmasawnna hawi Sawrkarin mipui hrilh tur a neih tlem phah thei tih hriat nawn a tha bawk ang.