Aizawl; Information, Communication & Technology Department chuan Mizoram sawrkar hnuaia department website a siamsak enkawl (update) tha lo te chu November thla hian tlangzarh a tum niin thulakna chuan a tarlang a. A enkawl that leh chhiat pawh Department head kuta innghat ah ICT chuan a ngai bawk. Department 125 lai a thlawnna website siamsaktu ICT chuan a enkawl (update) hna chu department lam chan a ni tih ZALEN palai a hrilh a. Department thenkhat, website enkawl tha tak tak an awm laiin thenkhat erawh ngaihsak vaklo leh update ngai lemlo pawh an tam tih an sawi bawk. Website enkawl (update) that leh thatloh chu department head te ah nasa takin a innghat a, IT lama hmasawnna a nih beiseiin nikum lama an tih tawh angin November thla hian department website enkawl tha leh tha lo list tihchhuah an tum thu ICT hna thawkte chuan an sawi. ICT hian July 2012 atang khan department website a siamsak tan a, a siam tawh 125 bakah kum in chhungin website 10 dang siam leh an tum niin an sawi a, sum harsatna avangin duh angin an thawk chak thei rih lo niin an sawi. ICT in website an siam te hi a lan dan inang tlang vek (common template) an ni hlawm a, hei hian website tlawhtu te tan awlsamna engemaw chen siam mahse Governor, Chief Minister, Directorate, PSU, RD Block leh a dangte chu a lan dan hranga buatsaih tumin tan an la leh mek niin ICT hna thawkte chuan an sawi.