Court-in vawi eng emaw zat an chungchang a ngaihtuah hnuah American actor Johnny Depp chuan a nupui hlui Amber Heard lakah hnehna a chang ta tlat mai le. Kum 58 mi Depp hian thiam a chan hnuin, "Jury-te chuan ka nunna min pe let leh a ni, ka lawm tak zet. Thudik chu a ding chang thin," tiin a sawi. 

Court-in thutlukna a siam hma khan Depp hi London-a Royal Albert Hall-ah Jeff Beck nen an concert a, hemi tum hian mipui ten an thlawp zia lan tir nan 'standing ovation' an pe hial. A hnu lawkah Depp-Heard trial-ah hnehna a chang zui leh bawk a, tunah chuan a thaw ve huai tawh ngei ang. 

An thubuai hi US-ah ngaihtuah a ni a, mahse thutlukna puan a nih lai hian Depp hi UK-ah a awm a, a hmunah inlan lo mahse amah thlawptu mi eng emaw zat chu Court tualah an pung khawm a ni. Depp chuan, "Thudik hailang tura kan zin kawng hi a hautak em em a, ka dinhmun anga ding ve te pawh a puih ngei ka beisei, beidawng ngai suh u," tiin a tawng chhuak bawk.

Kum 36 mi Amber Laura Heard hian a pasal hlui hi khing nasa viau mahse hnehna a chan zawh tak loh avangin amah zawkin pawisa a chawi a ngai dawn! Amber Heard hi dik lo taka a pasal a tihmualpho avangin court chuan $15 million chawi turin a ti a, Depp pawh a dik famkim bik loh avangin $2 million chawi ve tura tih a ni bawk.