Aizawl October 21, 2023: AMC Deputy Mayor R.Thanglura chuan vawiin chawhnu Vanapa hall kawt atangin khawvel a Sandtone Cave thui ber Krem Puri, Laitsohum, Meghalaya lut tur Zotrek Adventure Club a vailiam.

Ruahman dan chuan Zotrek Adventure Club-te hian October ni 23 leh 24 ah puk hi an lut in, ni 24 tlaiah Aizawl panin anlo haw leh ang. Zotrek hi Mizoram Adventure Club lian ber niin club member 120 chuang an awm mek a. He caving expedition-ah hian club member mipa 20 leh hmeichhia 10 an vaiin mi 30 an kal a ni. Dy. Mayor Thanglura chuan Zotrek Adventure club in kum 10 chuang Adventure activities hrang hrang tana proggramme an lo buatsaih thin leh Adventure sport lama tui mi thalai leh kum lam a upa zawk thlenga club tha tak ani chu a hlut thu sawiin, Zotrek kal zelna turah duhsakna a hlan ani.

Expedition leader F. Vanlalhriata chuan puk luh tur chanchin sawiin, Krem Puri hi khawvel a sandstone cave thui ber niin 24.5 kms lai a thui a ni a. He puk hi Liatsohum, Mawsynram dist, Meghalaya a awm niin, Shillong atangin 56 kms vela hla a awm a ni. Krem Puri hi kum 2016 khan hmuhchhuah a ni a. International expert team, scientist leh experience cave explorers rual, ram hrang hrang atanga kal khawm ten ni 25 chhung survey neiin a puk hi an zir chiangin an teh chhuak a ni. Survey an neih lai hian puk chhung atang hian kum makdatuai 66 kalta vela dinosaur ruhro ni a hriatte pawh an hmu chhuak a ni. 

Zotrek Adventure Club hian kum 2014 khan Krem Mawmluh cave, Meghalaya an lo lutchuak tawh a, Krem Mawmluh hi leilung chanchin zirna a puk pawimawh tak a ni a, International Union of Gealogical Sciences, first 100 Cave zing a mi a ni.