Aizawl: MNF adviser, cabinet minister ni bawk Lalruatkima’n hnam thinlung pu chunga development atchilhtu CM Zoramthanga kaihhruaina hnuaiah hmasawnna hna theih tawp chhuahin he sawrkar hian a thawk tih a sawi.

Vawiina Aizawl Press Club-a thuthar thehdarhtute a kawmnaah he thu hi sawiin Aizawl West II biala MNF candidate ni bawk, Lalruatkima chuan kum 2018 election-a an manifesto pawh za-a sawmriat (80%) vel lai an tihlawhtling hman tih sawiin, hmachhawp leh hmabak an la ngah hle niin a sawi bawk.

Nationalist sawrkar hian Zofa hmun hrang hranga mite tan pa chan a chan thu leh Myanmar, Bangladesh leh Manipur Zofaten harsatna tawkin Mizoram an pan tih a sawi a, “India sawrkarin rem a ti lo chungin kan tuamhlawm a, ei leh in leh silh leh fen tur kan ngaihtuahsak a. Hmun hrang hranga Zohnahthlakte insuihkhawm zel nan leh nationalism lama hma kan sawn zel nan MNF hi a sawrkar leh a ngai tih chu nationalist-te ngaihdan a ni,” a ti bawk.

Ramri chungchanga sawrkar chet dan pawh mipuiin an hria nia sawi bawkin, “Vairengte police check gate thlang thlengin Assam Police an duty thin a, tunah chuan Vairengte police check gate thlang km khat chuangah kan police-te an tawlh thla tawh,” tiin, “A bul vel pawh kawng hrang hrangin kan chei a. Bairabi Zophai-a ram hauh nana MZP-ten chawlhbuk sak an tumna atanga Assam lam km nga velah kan police-te an awm tawh,” a ti a, Thinghlun lamah pawh Assam-in an awp thin km hnih vel an luah tawh thu te, pi leh pute atanga ram chin hauh turin he nationalist sawrkar hian theihtawp a chhuah a, a tul a nih chuan silai pawh a puak mai niin a sawi.