Aizawl: District Industrial Centre, Aizawl District, Ramhlun venga mi chuan bungraw mumal nei lo leh training pawh an pe mumal thei lo niin thudawnna chuan a sawi. Hetih lai hian DIC chuan Directorate lama sum an hmuh tawh loh avangin chetlak har an tih thudawn a ni bawk. Prism chuan thuchhuah siamin hall sakna tur vengin an dil Directorate in a duh lo chu an thlawp thu thu chhuahah an tarlang. Thudawnnain a tarlan dan chuan DIC hian PMEGP (loan) leh NLUP an khawih lian ber a ni a, Rural Industrial Development Centre kalpuiin hemi hnuaiah hian trade sarih (7) mi 35 tan zirna kalpui a ni a. ‘Khawl hman tur tam zawk chu kum 30 kalta ami an ni a, hman hleih theih an ni lo a; 2000 hma hret khan khawl then-khat chawmtu electric connection phei chu tih-tawp a ni a hmanzui theih lohin a awm a ni’ tiin thulakna chuan a tarlang. Zalen-in thulakna pakhat chuan DIC chu tunhma chuan Directorate atangin LOC siamsak an thin thu leh harsatna an neih ngai loh thu a sawi a. Zawhna chhangin, “1980 chho vel kha chuan DIC hian hna a thawk thaa mipui pawhin an chhawr a. Bungrua upgrade turin rawtna siam thin a ni a, Directorate lam atangin khawl thar leina tur leh thil danga hman tur atan sum an hmuh tawh loh avangin DIC tan thil tih a har a ni,” tiin a sawi a. Training material leh enkawlma tur sum chu Department kutah a awm tawh nia sawiin training tam zawk chu DIC chuan a kalpui thei loa, automobile training pawh a tawp titiha, wiring lam training erawh DIC chuan a la kalpui niin a sawi bawk. Prism chuan an thuchhuahah Mini Tool Room hmun leh building, veng chhung hall siamna atana sorkarah an dil mek department directorate-in a remti lo chu Prism chuan sorkar kan thlawp tlat tiin an tarlang bawk. Zalen chuan Directorate hotute phone a biak pawh a tum a, line a tlang lo leh a tlang awmchhunin call an lak mai theih loh vangin Department thu leh hla hriat theih a ni ta lo a ni.