NGO pakhat chuan DIC tlawhin a hmunhma leh enkawl a nih dan a chhiat thu an thuchhuahah an tarlanga; hnathawk te pawhin hna an thawk hlei thei loa, khawl an neihhchhun a hlui hlawm avangin hman theih an ni mang loa. Training tura tirh te pawhin DIC a khawl an neih loh zirtir niin thuchhuah ah chuan tarlan a ni. Thudawnna dang ewrawh chuan DIC chuan a dawng tur ang sum a dawn loh vanga hma la thei lo leh inenkawl thei lo an nih thu an sawi ve thung a, Directorate in an mamawh an pe hlei thei lo niin sawi a ni bawk. DIC hian ram tan pawimawhna lian tak a nei a, ramin thil siamchhuah a neihte chawi kangin, bungraw siam chhuah leh a kaihhnawih lama tui mi sum pai mamawh zat nei lote Central leh scheme dang hmanga din chhuah tir hna an thawk a ni. Mi remhria leh lehkhathiam te'n industries leh hemi kaihhnawih hmanga bul an tan leh lo kalpui mek ten hak an zauh theihna turin DIC hian hma a lakpui thin a. A taka hnathawk duhte thlithlaiin sum leh thiamna hmanga hma sawn tir chu an tum zinga langsar tak a ni bawk a ni. Sum lutchhuak a hrawa, bank kaltlanga entrepreneur te puitu an nih avangin DIC hi ram hnuk siam thei a ni hial awm e. Kan ramin siamchhuah a nei lem loa, economy nghawng a ni a, eizawnna nei lo te dinkhawchhuah tir chu an kuta awm a nih avangin ram tan a pawimawh hle a ni. Training pahnih khat bak kalpui hlei thei loa a awm hi Sawrkar lamin ngaihven thei se a va tha em. Hetih rual hian mipuiin Sawrkar a thlanna democracy ram kan ni a, mipui thiam loh vanga thil tha lo thleng a awm fo tawh thin a, a thlangtuten sawrkarah ngiat an nei ve thin a; thuneitute pawhin duhsak zawng an nei thei a, hemi vang hian DIC chauh ni lovin, department dangte pawh an hming a hliau lek lek thin a. Sawrkarin eizawnna lama thalaite an dinchhuah a duh a, scheme tam tak siam a ni tawh thin a, heng scheme te siam a nih chhan hlenchhuak thei lo, engmah nihpui lo tur thenkhat te chu thuneihna hmanga chhawmdawlna pek nia sawi thin a ni a; hei hian nghawng chhe tak a hringa, vawiin dinhmun thlenna chhan pakhat a ni thei a. Department dangah pawh hetiang hi a thleng nia sawi a ni fo bawk a, eizawnna lama bul tan tumte tihnualtu zing ami a niin a ngaih theih a ni. Kan ram enkawl chhunzawmtu tur thalai tam tak chu beidawngin an awm phah nual tawh a, sawipui tur nei lote tan thil a tih theih loh nia ngaihna mi tam tak rilruah a intuh mek a, lehkhathiam hna hmu lote beidawngin an awm zel chuan kan hmabak a a eng tehchiam lo ang. Kan ramin sum harsatna a tawk mek a, kawng hrang hrang dapin theih tawpa inren chem a tul ta a, Sawrkar hnathawkten hamthatna an dawn te paih/tihtlemsak an ni a, kum danga sum hman tura ruahmanna pawhin hniam lam a pan a; mipui nghawng tlem theihna turin department a zirin sum ruahman te chu sawi danglam an ni ta hial a ni. Hemi ah hian inpuh tawn tur kan awmin a hriatloha, sawrkarna lo chelh tawh party te'n an mi leh sa an duhsak tih chu tlang hriat a ni a, a thlangtu mipui lam pawhin kan roreltute luhaiin an siam a, mi mal chauha inhaivur duhna a lian lo thei lo a. Sawrkarna siama a fawng chelhtu zingah mipui rawngbawl tura inpe nghilh ta mai an awm em ni? tih ngaihdan nei an awm thei bawk. Heng lungthu pathum - Sawrkar, mipui leh Department enkawltu lawk te hi lungthu ang an ni a,ram hma hun chu an pathum zingah hian a innghata, pakhat a che a nih chuan rorelna a lek lo thei lo. Sum harsatna chu engpawh nise DIC pawimawhna hraiin Sawrkar hian ngaihven tam deuh sela; felhlel thil a awm palh a nih phei chuan huaisen takin hma a lak a ngai bawk ang a, tun dinhmun DIC-in a thlen chhan leh chingfel tura hma a lakna te chu Sawrkar pawhin mipui a hrilhhriat a pawimawh ang.