ZALEN October 6, 2025: Mizo Hnam Run inkhawm vawiina neih a, Political session-ah MNF President Zoramthanga chuan, "FCAA dan hi a that leh a chhiat kan sawi lova, kan thuneihna vawnhim a tul kan ti a ni ber. He dan kan duhlohna chhan tam tak zingah, international border atanga Km 100 huamchhunga state sawrkar rawn lova central-in tul leh pawimawh an tih a kut an thlak thei tur hi a pawi lehzual a ni," a ti. 

Zoramthanga chuan, "He dan hman kan duh loh thu hi passed kher lo mah ila, Peace Accord (Art. 371 G) hian min humhim sa a ni. Hei hi a chian lehzual a, kan lo in ralrin nan MNF-in kan duh loh thu kan lo passed a, central-ah kan thawnthla nghal a ni."

"A dil pawh min dil hmain ZPM sawrkar chuan pawnfen hmalam hlimsang sain, dawih aw chhuahin, a engamah hmain an lo pawm sak ta a. Kan hnam pasalthate thisena leichhuah, mipuiin kan tawrhchhuah, kan hnam himna, kan leilung chunga thu kan neihna chabi chu central hnenah an hlan a ni," a ti. 

MNF President chuan, "ZPM hi Absalom-a ang deuh an ni a. Lal leh thuneihna duh luat avanga ropui thei ang bera inlantirin, thiang leh thiang lo pawh pawisa loin thuneihna an lek a. An hotupa Pu Duha hi, mi tlemte, dictatorial power hmanga lo awpkhawm thang tawhtu a ni a. Kum 40 zet hetianga a lo kal tawh avangin a thanhnan tawh a."

"Tlawmngai pawlte leh kohhran hote ngaihtheih lohna pawh hi thanhnan thil a ni. Amaherawhchu, hetianga mahni duh duhdana khawsak hi sawrkarah chuan a lo remchang lo tawp mai a. Mahni tuilo awpkeu, dawtsawi hreh lo sawrkar hian rei a daih lo ang. Absalom-a ang hian politics khawvelah, lei si lo van si lo a huntawp hman hi thil awm thei a ni," a ti bawk.