Football chanchina dai mai tawh lo tur Diego Maradona'n goal thun lar em em pahnih a khung tuma ball an hman chu lilam tura ruahman a ni.

Kum 1986 World Cup quarter final hmingthang tak England leh Argentina inkhela match ball hman hi £2.5 million atanga £3 million bawr vel nia chhut a ni.

Maradona-a'n 'Hand of God' goal a khung tuma referee Tunisian Ali Bin Nasser chuan ball hi a hralh dawn a ni.

Bin Nasser chuan, "He ball hi football history-a tel a ni a, khawvel hmaa pho chhuan hun dik tak a ni," a ti.

1986 World Cup quarter final-a England leh Argentina inkhelh ṭumin he ball hi hman a ni a, sport kaihnawih thilah chuan he ball hian pawimawhna tak a nei a, a man pawh a tlawm dawn lo a ni. 

Ball hi minute 90 chhung hman a ni a, World Cup chanchinaah he inelna hi match sawisel hlawh ber pakhat a ni. 

He inkhelhah hian Maradona chuan goal hmahruai a khung a, hemi tum hian England keeper Peter Shilton-a'n ball a khawih hmain Maradona hian a kutin ball chu a hui lut zauh a ni. 

Bin Nasser hian a handball tih a hmu lo a, goal-ah a pawm sak a ni. A hnuah amah Maradona hian "Maradona lu tlem leh Pathian kut a tel" tiin a sawi.

Maradona bawk hian he match-ah hian goal ropui tak a thun bawk a, he goal hi a hnuah 'goal of the century' atan thlan a ni. Hemi tum hian England player zet bum tlangin keeper tha Shilton a paltlang bawk.

He game-ah hian Argentina chu 2-1 in an chak a, Mexico World Cup-ah hian an champion zui bawk a ni.

He ball hi World Cup special event neihna tur atan November 16 hian lilamnaah hralh a ni ang. Live-a pek chhuah a ni ang a, a lei duhte chuan October 28 aṭang hian online-ah an ngamna zat tarlangin an chhang thei ang.

Graham Budd Auctions chairman Graham Budd chuan,"Inkhelh hun chhung, team pahnih inkar chanchin leh handball te hian he match hi football chanchina match lar leh rilru ti na ber pawlah a siam a ni," a ti.

Tun hnai lilamna atangin infiamna thil lilam atanga record siam an awm nual a, 1986 quarter final-a Maradona kawr hak kha May thla khan $9.3m (£7.4m)-in an hralh a, record thar a siam. Thla thum hnu August thla khan Mickey Mantle-a baseball card chu $12.6m (£10.3m)-a hralh ni lehin record dinglai a khum. September thla khan Michael Jordan-a'n kum 1998-a NBA final-a a jersey hak chu $10.1 (£8.7m)-in an hralh bawk.