Aizawl February 16, 2023: Mizoram Pradesy Youth Congress Committee (MPYCC) chuan District Institute of Education and Training (DIET) hnuaia Mizoram District hrang hranga thawktu mi 217 ten thla thum chhung hlawh an la tawh lo chu pawi an tih thu an sawi a, a rang thei ang bera an hlawh a batsak te pe turin Mizoram Sawrkar an phut a ni.

Congress Thalai chuan thuchhuah an siamah District pariata DIET-ah thawktu Group A-ah mi 118, Group B-ah mi 99 an awm mek, an ti. 2022 November leh December thla hlawh bakah kumin January 2023 hlawh hi an la lo, tiin, hundangah pawh an hlawhte hi an la mumal lo fo thin a ni, an ti. 

MPYCC chuan Mizoram Sawrkarin sum a enkawl thiam loh avanga heng harsatnate hi thleng chho zel a ni an ti a, Thla thum chhung DIET hnathawktu tena hlawh an la lo hi Mizoram sawrkar chak loh vang liau liau a ni, an ti bawk.