Aizawl: Mizoram Youth Commission Chairman Joseph Lalhimpuia chuan Zirtawpni kalta khan DIET Multipurpose Hall, Lunglei-ah Bachelor of Education (B.Ed) zirna a hawng. Joseph Lalhimpuia chuan, “Kan rama zirna kan siam that dawn chuan DIET-ah bul kan tan a tul a ni,” tiin B.Ed Course zirlaite chu thahnemngai taka thawk tur leh ram leh hnam hmasawnna kawnga an mawhphurna a sanzia hre nawn turin a chah. Joseph Lalhimpuia chuan zirlaite mamawh hmasawnna ruhrel changtlung tak buatsaihna turin NABARD atangin Rs. vaibelchhe 24 hmuh tawh a nih thu leh NLCPR sum Rs. vaibelchhe 10.4 hmanga Mizoram School Education Department hnuaia hmun khata project lian ber Teachers Training Complex, Lunglei Electric Venga buatsaih a nih tur thu a sawi a. Mizoram University Southern Campus Lungleia nei thei turin sawrkarin theihtawpa hma a lak thu leh amah ngeiin hemi chungchanga UGC Chairman leh MHRD Secretary a hmuh thu te a sawi bawk. DIET Lunglei hi kum 1974-ah Undergraduate Teachers Training Institute (UGTTI)-a bul tan niin tun dinhmunah zirlai 224 an awm mek a, B.Ed zirlaite hi mi 50 an ni.