Aizawl July 30, 2024 : Mizoram Pradesh Youth Congress Committee chuan vawiin khan District Institute of Education & Training (DIET) Principal leh thawktute chênna in (Quarter) an tlawh a, DIET quarter-a chêng tur ni lo Chief Minister Lalduhoma Campaigner a awm tih an han hmuchhuak. Quarter hi DIET hotute kuta hlan tawh niin Staff-te chenna tura ruahman a ni a, Staff quarter hi an indaih lo hle niin an sawi.

MPYCC chuan an thu zawhfiahna atanga a lan danin he Quarter-a awm hming tumtu hi Lalthansanga, ZPM Party-a nihna sâng tak PAC Member lo ni tawh leh tuna Adviser ni mek a ni an ti. An chhungkaw member zingah sawrkar hnathawk emaw, DIET a thawk emaw sawi tur an awm lo tih an finfiah bawk. Chief Minister ni mêk Lalduhoma sawipui leh awm tir niin thu an dawng bawk a ni.

MPYCC President Laltawnliana chuan, "A luah tûr ni lovin he Quarter an luah hi a pawi hle a, a rang thei ang bera inthiar chhuak turin MPYCC chuan kan ngen a. Hetianga Party mi uchuak taka induhsakna an kalpui hian Kalphungthar sawrkar that lohzia a lantir chiang hleah kan ngai a. MPYCC chuan an chhuah leh chhuah loh hi kan enzui zel dawn a ni," a ti.