Aizawl April 4, 2023 : Vawiin khan ZPM Leader Lalduhoma, MLA chuan Tuivawl Block conference a, hmanpui naah thu sawiin, "Thlarau thianghlim tel ve theih lohnain chhungkaw tam takin ei kan zawng mek a, Pathian malsawmna kan dawn thei lo a ni. Dik lohna hi ngaiah kan neih ta mek a, dik lo zawk awtin nitin nun kan hmang mek a ni," a ti.

ZPM Leader chuan, "Vawiinah hian Lal Isua Economy chungchang sawi ka duh. Pathian tel lo devolopment chuan nuamtawlna leh Pathian mamawh lo nia inhriatna a thlen a, a tawpah chhiatna leh mualphona a thlen leh thin a ni. Nawmsak hmasak a, reilote chhunga hausak thur thur tuma politics kan khelh chhung chuan kan ram hi a chhe zel dawn a, sawrkar official leh mipui mimir pawh rinawm hlei thei lovin min siam ta mek a ni. Thlarau thianghlim tel ve theih lohnain chhungkaw tam takin ei kan zawng mek a, Pathian malsawmna kan dawng thei lo a ni. Dik lohna hi ngaiah kan neih ta mek a, dik lo zawk awtin leh itin kan nun kan hmang mek a ni," a ti.

Sakawrdai-a block conference a hmanpuinaah hian Vote lei chungchang sawiin, Duhoma chuan, "A langin sum leh pai hmangin vote kan zawng a, chuti chung chuan neih engmah nei lo ZPM Candidate te Serchhip leh Lunglei-a LMC thlanna neihah thlan tlin kan ni. Hei hian pawisa hmanga inleitlin ngawt a theih tawh loh a ni tih chiang takin a tilang a, a lawmawm takzet a ni. Tuivawl bial hian a rethei apiang in lo thlang tling tawh thin a, huaisen taka dikna tan ngam zel turin ka sawm che u a ni," a ti a.

MNF sawrkar chungchang sawiin, "Vawiina kan ram hruaitute chet dan en hian Pathian malsawmna dawng tlak niin kan hria em?  Kan sum enkawl dan te, kan Contract hna inpek dan leh thawh dan te, RBI lamin kum thum chhung ba hnem ber nia min puan chian em em lai pawha ba nei tlem bera kan la insawi tlat te hi hrilhfiah theih pawh an ni lo a, an sawi pial ngar ngar a; a manganthlak takzet a ni. Pathian duhdan zawnga he ram hi enkawl a nih hunah he ram hi a kal dik ang a, malsawmna pawh kan dawng dawn a ni," a ti.

Lalduhoma chuan, "Pathian leh mipui zara sawrkarna kan chan chuan helai hmun kawtchhuah pawimawh tak hi kan ngai pawimawh hle dawn a, kawng leh lui te hi a theih anga thaa cheibawl kan tum dawn a ni. Sinlung Hills Development Council hian dan mumal tak a neih theihna turin hun rei tak atang tawh khan Assembly House-ah pawh kan lo au ve tawh a, vawiinah dan mumal tak kan nei ta hi a lawmawm hle a, kan dan neih erawh a nihna tur anga hman a la ni lo erawh a pawi hle a ni. ZPM a sawrkar hunah chuan sawrkarna chelhtu leh Hmar mipuite hi pumkhatin kan awm ang a, pawl pawl awma kan kal reng hi tihtawp a ni ang a, Aizawla Council Office awm pawh hi helai hmunah ngei hian sawn a ni ang," a ti.