ZALEN, November 08, 2025: Inrinnia social media-a video darh pakhata Mizo hnam lâm ngaihhlut hlawh tak, cheraw kân dan dik lo taka kân chu pawl hrang hrangin an sawisel nasa hle a, Art & Culture Department chuan zir chiana hma lak an tum.

Department-in thuchhuah an siamah cheraw kân lai dik lo tak maia Aizawl veng pakhata entir a ni chu pawi an tih thu an sawi a. Hnam lâm hi a tibawrhbang zawng leh a zahawmna tihmelhem zawnga entir an phal lo tih mipuite an chah nawn a, tuna video darh mek pawh hi zirchiangin hmalak an tum tih an sawi.

Mizo Cultural Organisation (MCO) pawhin thuchhuah siamin November 7, 2025-a hmun pakhata mi tute emaw programme buatsaiha Mizo hnam lam mawi lo taka entir a ni leh a video a darh vak mai chu an ngaimawhin an duh lo hle tih an sawi a. Mizo hnam lâm chi hrang hrangte chu hnam rohlu a ni a, chawi nuna tihlar zel an duh a, a hmasawn zawng ni lova hetianga uchuak taka lantir a ni chu an dem tih sawiin hetiang zawng hian tumah che tawh lo se an duh tih an sawi.

A video pawh tumna thehdarh tawh lo se an duh tih an sawi bawk.

Mizo Culture Artistes’ Association pawhin Mizo hnam lâm khawih danglamsaktute chu an demin an lungawi lo tak zet tih an sawi a. Hma lak theihna chinah chuan na takin hma an la dawn tih an sawi bawk.