ZALEN October 11, 2024 : Vawiin khan Congress Party chuan Congress Bhavan-ah 'Friday Political Session' an hmang a. He hunah hian MPCC General Secretary Lalbiakzama, MPS (Rtd) chuan Dikna rorelna kalpui ngam a ngaih thu a sawi.

Lalbiakzama chuan "Mahatma Gandhi kha dikna duh vanga tuar ngam a ni a, ka ngaisang a ni. 'Rorelna dik' kan sawi thin a, 'Dikna rorel' ti ila a dik zawk em? Keini Mahatma Gandhi ideology kalpuitu Congress party hian dikna rorelna kan kalpui ngam ang em? Kan chenpui hnam tenau te lakah hian dikna rorelna kan kalpui ngam ang em tih hi kan inzawh a ngai a ni."

"Thil diklo hi kan enliam mai dawn em? Delhi tlanga kan zah thinna leh hnar kan hmuh len thinna chu kan vai Officer leh sumdawngnte lakah pawl thenkhatin donation an khawn thin hi a ni. Donation chu khawn thiang a ni a, mahse an pek phal tawk kha pawm se a tawk mai a, a bak phut chhuah leh hi thil dik a ni lo a, dikna rorelna a ni thei lo. Hei hi kohhran leh YMA thlenga kan dodal ngai a ni." a ti.

MPCC GS chuan, "Kan Boundary te khu kan vei a, kan sawi thin. Tunah khuan kan boundary a la che lova, engmah a la danglam lo a ni. Boundary chungchangah kan tana tha turin ngaihtuahna seng ila, dinna nghet kan neih a ngai a ni. He kan ramri buaina hi tharum nen, inkahna nena chinfel chi a ni lova, inbiakna nena chinfel chi a ni," a ti bawk.