Mizote kut ngaihhlut ber Chapchar Kut chu March 3, Zirtawpni khan hmun hrang hrangah hman a ni a, a lawmna pui ber chu AR Lammual, Aizawl-ah neih a ni. Mipui thahnem tak an pung khawm a, heta tang hian Miss Chapchar Kut leh Chapchar Kut Lady thlan a ni. 

Diktawn chuan Miss Chapchar Kut an thlang a, hetih lai hian Mizo Photographer's Society pawhin Chapchar Kut Lady an thlang ve bawk. District hrang hrangah Miss thlanna hi kalpui a ni bawk - Chapchar Kut denchhen hian Miss kan neih belh teuh dawn a nih ber chu! 

Miss Chapchar Kut
Diktawn chu Chapchar Kut den chhena Miss thlang hmasa leh kalpui rei tawh ber an ni a, an hlawhtling viau bawk. Miss an thlan chhuah tawhte hi hriat hlawh zui tak tak an awm fur a, a hma hun atana kawng sialsaktu pawimawh tak an ni. 
Sawiselna awm bawk thin mah se Diktawn hmalakna hi a fakawm a, Miss thlan tur an la haichham lo zel hian a hlawhtlin zia a tarlang kan tithei awm e.  

Chutih rual chuan Kut hmang tura kal Miss atana an lo pawh pen, Hall-a an khung nilen tak mi tam tak an awm thin. Hei hi mi tam takin an sawiselna chhan lian ber chu a ni a, lawmman dawng pha lo an nih leh lek phei chuan a lawmawm lo ve reng bawk. Chutih rualin mimal duhthlanna a ni a, intihluina a awm loh avangin dem ngawt theih an ni lo - Miss Chapchak Kut nih an duh tihna a ni mai! 

Diktawn hian Kut ni khan top 50 an thlang chhuak nghal a, chuta tang chuan top 20 leh top 10 an thlang chhuak leh - result hi March 11-ah puan a ni ang. 

Chapchar Kut Lady
Hei hi Mizo Photographer's Society ten an thlan a ni ve thung a, kum eng emaw chen chu an lo kalpui ve tawh. Kut Lady atana an thlan chhuahte hi hriat hlawh tak tak an ni zui nawk a, sawinep chi a ni hauh lo. 

Chapchar Kut hmang tura Lammual-a kal khawmte atangin an thlang thin a, inkhung khawm aiah thla lak sak 'policy' an kalpui ve thung. Thla an lak sakte hi Mizo Photographer's Society Facebook page-ah an post leh a, chuta tang chuan top 20 an thlang dawn a ni. Vawiin Pathianni thleng hian hun hawn a ni a, heta tang hian top 20 thlangin, top 10-ah an inthlifim leh bawk ang. 
An thlalak atang ringawtin an teh hauh lo a, an mimal nun zir chiangin hmeltha leh nungchang tha an thlang chhuak thin tih hriat tel a pawimawh bawk. Result hi March 14 velah an puan a rinawm.