Aizawl: Aizawl District Disaster Management Authority (ADDMA) hotute chuan tunlai ruah sur avanga chhiatna hrang hrang thleng chungchanga mipuite'n an himna atana an hman theih tur mobile application 'DDMA Aizawl' tih chu siam a nih thu leh mipui te'n awlsam taka playstore a\anga an download theih thu an sawi. ADDMA hotute chuan he mobile application hmang hian mipuiten an bulhnaia chhiatna thleng a awm chuan Zonal Officer te hnenah thlalak nen an report zung zung thei dawn niin an sawi a. Heng bakah hian mipuite himna tur hrang hrang dah tel niin chhiatna thleng a awm chuan he app hmang tute hi a hriattir zung zung dawn a ni. He mobile app ah hian 'report a concern' tih awmin hetah hian chhiatrupna thleng a awm chuan mipuiten ADDMA ah an thlen thei bawk. DDMA App ah hian 'Rescue me' tih inziak awmin hei hi mipuiten chhiatna a thlen a tanpuina an mamawhin an hmet ang a, an awmna hmun chu awlsam takin thuneituten an lo hre nghal dawn a, District Emergency Operations Centre (DEOC) ah phone a kal nghal vek dawn bawk a ni. 'Call DEOC' tih pawh awmin hei hi mipuite'n chhiatna an tawrha biakpawh theih tur a ni a, hliam na lutuk an tawrh loh chuan direct-a DEOC an biakna tur a ni. He mobile app ah hian mipuite hriat zau nan ADDMA chungchang leh an hnathawh te kimchang takin a inziak a, mipuite chu an awmna ah internet connection awm lo mahse he app ah hian zonal officer zawng zawngte biak theihna a awm a, phone call pang -ngaiin he app a number te hmang hian chhanchhuaktu an be thei dawn a ni.