February 14, 2023;  UD&PA changtu Tawnluia'n Mizoram a district headquarters zawng zawngah bawlhlawh sawngbawlna hmun 'Solid Waste Management Centre' din turin hmalak mek a ni tih house a hrilh.

Vawiin Assembly Budget Session ah member te zawhna leh zawh belhna te chhangin, tun dinhmun ah Aizawl leh Kolasib ah Solid Waste Management Centre a awm tih a sawi a, district headquarters bakah notified town ah te pawh a dinna tur hmun en mek a ni tih a sawi.

UD&PA minister sawi danin, Hualngohmun a Solid Waste Management Centre din mek chu special assistance atanga hmuh Rs. vbc. 16 senna tur a ni a, PWD kutah pek niin, tender chhuah a ni tawh a, final stage ah a awm tawh.

Tuirial a Solid Waste Management Centre chu AMC enkawl a ni a, Industrial Gowth Centre ah a hmun neih fel a nih tawh bakah, Sihphir lamah pawh a hmun zawn mek a ni.