Aizawl April 13, 2024 : Election Commission of India in kum upa, kum 85 chin chunglam leh pianphunga rualbanlo te tan in lama vote an thlak theihna tura ruahmanna a siam 'home voting chu kalpui mek a niin district 8 ah zawh a ni tawh.

Home voting hi district pathum Champhai, Serchhip leh Lawngtlai-ah te kalpui mek a niin Zirtawpni atang khan Champhai district-ah chuan kum 85 chunglam leh rualbanlote tan in lama vote thlak (home voting) kalpui tan a ni a, home voting bultanna hi District Election Officer James Lalrinchhana chuan telpuiin Champhai District-a voter upa ber leh home voting hmanga vote thlak hmasa ber Lalbiakliani (103), Rahsi Veng, Champhai Vengthlang leh PwD vote thlak awm chhun Vanlalzawni (40), Champhai Bethel Veng te chu an chenna inah tlawhin democracy chawinun zel nana midangte tana entawntlak ni tura vote an thlak chu fakawm tiin lawmthu a sawi.

Serchhip District ah chuan home voting hi Ningani atanga tanin nimin thleng kalpui a ni dawn a ni. Serchhip District pumah kum 85 chung lam 135 leh PwD voters home voting dil 41 an awm a ni. Lawngtlai District-ah April ni 8, 2024 khan home coting kalpui tan niin nimin khan zawhfel tum a ni.

Mizoram pumah kum 85 chin chung lam mahni ina vote thlak dil pawmsak 1823 an awm a, pian phunga rualbanlo mahni ina vote thlak dil 302 an awm bawk.