Aizawl: MNF Vice President Dr. R.Lalthangliana chuan, “Pathian leh mipui zara kan sawrkar chuan Hnahthial, Khawzawl leh Saitual te hi district ah kan tipuitling dawn tih kan puang nawn leh a ni,” a ti. Nimin Cherhlun Bazar kawna vantlang inkhawmah thu sawiin Dr. Thangtea chuan, “Congress sawrkar hmasa khan district 5-te hi a thu ringawta puangin ball-pen pakhat pawh an hnutchhiah lova, keini chuan sawisel hauh lovin kan tipuitling vek a. Kum 2008-a kan sawrkar tawp dawna District pathum chauh kan puan ve kha, Congress sawrkar kum 10 chhung hian a ngaihna a hriat thlawt loh avangin a tupuitling ve thei lo. Notification meuh pawh kan tihchhuah tawh District tihpuitlin hi keini tan chuan thil har lo tak a ni,” a ti a. Mizorama rorel lai, Congress chu inthlan hunah an tla dawn niin a sawi bawk.