Aizawl: April ni 30,2015 a Village Council leh Local Council inthlan neihzawh taka lungawilo te thu leh hla chu Tribunal in a ngaihtuah mek a, inthlan kaihhnawih ah hian thubuai VC ah 60 leh Local Council ah 7 ziahluh a ni. Village Council bikah hian Mamit district atangin complaint a lut tam ber a, hetih lai hian Aizawl district atang chuan complaint a awmlo thung. Mamit district atang hian complaint 20, Lunglei atangin 15, Kolasib atangin 13, Champhai atangin 9 leh Serchhip district atangin complaint 3 a lut a. Aizawl Local Council atanga lut hi Damveng, Edenthar, Vaivakawn, Lawipu, Khatla South leh Muanna veng te an ni a, Damveng atang hian complaint 2 a lut a ni. Zalen palaiin a kawmnaah State Election Commission a Secretary hna chelh mektu H.Darzika chuan V/C leh Local Council inthlan thubuai ngaihtuah tur hian district tinah Tribunal an din tih a sawi a. Thubuai ngaihtuah chungchangah Tribunal chu thutawp siamtu an nia sawiin, "Tribunal thuremna hi thutawp a ni a, keini chu kan inrawlh lo a, an thutlukna siam ang ang chu kalpui a ni ang," a ti a. Tribunal chu an control lo tih a sawi bawk. VC leh LC thlan thubuai ngaihtuah tur hian District hrang hrang tan mi 3 awmna Tribunal din a ni a, chairman, member secretary leh member awmna ah hian MCS Officer, Director level ten an kaihruai a. Tunlai hian hmun thenkhat ah thubuai ngaihthlakna (hearing) an nei mek a, case thenkhat chu an chingfel tawh nia thudawn a ni. Tribunal hi May ni 14,2015 khan din a niin ni 120 chhunga thubuai an neih ang angte chingfel tura tih an ni. April ni 30,2015 a Village Council leh Local Council inthlan neihzawh taka complaint lut, Tribunal in a ngaihtuah te hi a tam ber chu vote chhiar dan dik tawklo nia hriat vanga chhiar nawn leh tura ngenna a ni a. hei bakah hian vote chhiar lai hmuh phallo leh Returning Officer lakah lungawilohna te an nia thudawn a ni bawk.