Aizawl: AH & Vety Minister C.Ngunlianchunga chuan ni 14.6.2018 (Ningani) khan Diltlang ‘S’-ah Community Hall leh Supply Godown thar a hawng. C. Ngunlianchunga chuan Mizoram hmun thenkhatah leimin leh tuilianin chhiatna a thlen mek laia DM & R changtu Minister ber programme danga chhuah a ngai chu hrehawm a tih thu sawiin, Bungtlang ‘S’, Diltlang ‘S’ leh Chawngte ‘P’-ah te hun rei tak atanga programme lo duan lawk tawh, thulh rem tawh si lo a awm avanga kal tlangpui a nih thu a sawi a. Leimin leh tuilian tuarte a tuarpui tak zet thu sawiin, anmahni tawngtaipui ve turin Diltlang khaw mipuite chu a sawm nghal a ni. Diltlang ‘S’ Community Hall hawn tak hi concrete building, a dung fit 80 leh a vang fit 40-a zau niin, kum 2011 khan BRGF sum Rs nuai 20 hmanga bul tan a ni a. Kum 2016-17 BADP sum Rs nuai 10 hmanga chhunzawm a ni. Supply Godown hawn tak hi a dung fit 50, a vang fit 30 leh a san zawng fit 15 niin, NABARD sum atangin kum 2016 khan sak tan a ni.