ZALEN September 30, 2024 : Vawiin khan IMA, Mizoram State Branch aiawh te chuan Home Minister chu a office ah an kawm a. September 21 zana Durtlang Leitan-a an doctor pui te chunga kutthlak chungchangah an lungawi lohna te, a case kalphung fel tawk lo nia an hriat te leh sawrkarin Magisterial Enquiry ti ngei tura sawrkar an beisei thu te an hrilh.

Home Minister chuan sawrkarin he thil thleng chungchang hi an ngai thutak tih lo hrilhin, Magisterial Enquiry nei turin thutlukna an lo siam tawh thu a lo hrilh a. A rang thei ang bera he enquiry hi hmalak anih tur thu a lo hrilh nghal. IMA lamin an ngaimawh point hrang hrang an thlen te chu sawrkarin a tul angin a lo bawhzui tur thu a sawi bawk.

IMA hruaitute chuan sawrkarin Magisterial Enquiry ti tura hma a lo la chu lawmawm an tih thu Home Minister an hrilh a. Chutih rualin sawrkar hmalakna chu an thlithlai reng dawn a, rorelna dik a thlen ngei theih nan theihtawp an chhuah zui dawn tih an hrilh a. Mipui nawlpuite him nana Home Department chu theihtawp chhuah zel turin an ngen bawk a ni.