Aizawl; Drugs a inhnamhnawih mi thenkhat, Court in a chhuah leh mai thin chungchang zawhna chhangin Special Judge Lucy Lalrinthari chuan, "Tan tir kan duh pawhin Doctor ten na deuh deuh ang ten an ziak a, kan tan chhuah loh theih a nilo a. Hemi kawngah hian Doctor ten thudik an ngaih pawimawh a ngai a ni," tih tunhnaia Koh hran leh NGO aiawhte puala Pseudoephedrine (Methamphetamine) zirchianna leh sawihonaah a sawi. Magistrate pakhat chuan, “ A tlangpuiin magistrate te hian harsatna kan neih chu khehpuam case neite hi man an nih hian an duh doctor lehkha an rawn nei zel a, thenkhat chu natna nei hmel an pu lem lo, khatia lehkha an neih zel chuan bail a chhuah a ngai thin a, court chuan a chhuah lo thei lo a ni,” tiin a sawi a. “Doctor te hian a dik tak lo chu ziak lo thei hram se kei chuan ka duh khawp mai,” tiin ZALEN a hrilh a ni. Charge sheet an la nih loh avangin bail a chhuah chuan investigation chu thui tak mi mante hian an tihbuai theih thu magistrate chuan a sawi bawk a ni. Tunlai ruihhlo chhuak thar mek 'Methamphetamine' ti thin Mizoram ah mi 50 chuang deuh an awm niin Excise & Narcotics Department chuan an hre bawk a ni. ND&PS) Act, 1985 ah man theih Chi 111 lai tarlan a ni a, Mizorama lar deuh te chu Heroin, Opium, Ganja, Codeine, Alprozolam, Methamphetamine, Amphetamine, Diazepam, Morphine, Nitrazepam te a ni a. Pseudoephedrine chu 2013 khan controlled substance ah telh a ni a, tan theih a ni tawh a ni.