ZALEN August 04, 2026 : Lawngtlai District Magistrate chuan niminah khan thuchhuah siamin Lawngtlai District chhungah document dik lo siamtu leh a kawltute lakah FIR theh luh zel a nih tur thu a tarlang.

District Magistrate Donny Lalruatsanga chuan Lawngtlai District chhunga Birth Certificate, Tribal Certificate leh Permanent Residential Certificate (PRC) lem (fake) siam a, dik lo taka pek chhuah leh sumdawn nana hmang an awm tih hriat a nih thu sawiin, mipuiten document dik lo hmanga zirna sikulah emaw, scheme hrang hrang leh sawrkar hnuaia hamthatna hrang hrangte dawn tum nana lo hman tumte kan awm a nih chuan hmang lo turin kan inngen nghal a ni a ti.

Lawngtlai District chhunga document dik lo siam leh hman phal a ni lo tih sawiin, document dik lo siamtu leh a kawltute lakah FIR theh luh zel tur a ni tih District Magistrate chuan a sawi bawk.

Hriattirna chuan hetiang thil dik lo laka fihlim turin mipuite chu ngen an nih bakah, hetiang thil tih dik lo mante chu Bharatiya Nyaya Sanhita (BNS) Section 335 hnuaiah dan angin action lak an ni ang tih a tarlang.