Aizawl June 7, 2024 : MZP chuan Mizoram chhunga Dentist (Ha Doctor) hnathawk zingah document lem hmanga hna hmu awma a hriat, hmala turin Health Minister Lalrinpuii an lo ngen tawh. MZP ngenna anga Dentist-in banna a thehluh avangin MZP chuan lawmawm an ti.

MZP chuan Mizoram chhunga National Health Mission (NHM) hnuaia Dentist Surgeon (Ha doctor) hnathawk mek zingah document lem hmanga hna hmu an awm ngeiin a hria a. RTI Act hmanga MZP-in a chhui zui hnuah, NHM hnuaia thawk tur 2023 February thlaa lak zingah a tel a. Doctor a zir chhuahna nia tarlan Institution-ah hian a lut lo hrim hrim tih an finfiah bawk a ni.

MZP chuan Health Minister chu ni 21 June 2024 ral hma ngeia, MZP thu hriat a dik leh dik loh chhui chiang tur leh a tul anga hmala turin a ngen a. Lehkha bakah hmaichhanah pawh Minister hi an sawipui a ni.

Health Minister chuan hian bawhzui nghalin Dentist Surgeon chuan ni 5 June, 2024 (Nilaini) khan a mah chhawrtu National Health Mission (NHM)-ah banna lehkha a thehlut a. NHM chuan ni 6 June, 2024 khan banna lehkha hi a pawm nghal a ni.

MZP ngenna ngaipawimawh a, Health Minister-in hma a lak avangin MZP chuan lâwmthu aa sawi nghal a. Health Department bakah, Department dangah pawh hetiang thil; Document lem leh dik lo taka hna hmu an awm leh awm loh enzui zel an tum.