ZALEN October 20, 2024 : Kum 2023-a Mizoram State Law Commission-in biak in thleng kher loa Mizo dana man leh mual inhlan inneihna tlinga pawm an rel chu Mizoram Kohhran Hruaitute Committee (MKHC)-in an dodal hnuah a puitling ta lo nia thudawn a ni.

August 4, 2023-a thukhawm Mizoram State Law Commission chuan Mizo inneih chungchangah biak in thleng kher loa Mizo dana man leh mual inhlan chu inneihna tlingah pawm an rel a.

‘Mizo inneih, inthen leh rokhawmna dan, 2024’ chu Law Commission hmasa ber, R Lalrinawma kaihhruaiin an buaipui tawh a, John Siamkunga chairman a nih laiin zut mam niin, kum 2014 khan Mizoram Legislative Assembly-in a pawm a, February 13, 2015-ah hman tan a ni.

Dan chu siam that leh a ngai nia hriat a nih avangin Lala Khobung kaihhruai Law Commission chuan an ennawn leh a, Central YMA, MHIP Gen. Hqrs. leh mi mal atangtein siam that leh tihdanglam rawtnate an dawng.

Rawtna zinga an pawm langsar zingah inneihna chungchang a tel a, ‘tuna tih dan pangngai, biak ina inkutsuih chu la kalpui thoin, biak in thleng kher loa Mizo dana man leh mual inhlan chu inneihna tlingah pawm ni se,’ tih a tel.

Mizoram State Law Commission thuchhuak hi MKHC chuan duh loin, an duh loh thu chu August 9, 2023 khan khatih laia chief minister, Zoramthanga an hrilh a. Law Commission thuthlukna hi chief minister hnen a thlen hunah pawm lo turin chief minister pawh an ngen a ni.

ZALEN thudawn danin MKHC-in chief minister hnena ngenna an thlen hnu hian Law Commission rawtna hi a zuzi chho a, tun thlengin ngaihtuah chhunzawm a ni ta lo a. Sawrkar thar, ZPM kaihhruaina hnuaiah pawh hemi chungchang hi sawi rik a ni chhunzawm ta rih lo a. Mizoram pum huap ngaihtuah chuan Law Commission rawtna hi tihhlawhtlin a tul hle niin ZALEN thudawnna chuan a sawi.