ZALEN December 15, 2025: Supreme Court chuan mipui sahimna, vantlang hriselna ngaihtuahin khawlaia ui tla; neitu neilo (stray dog) te khuahkhirh a, thunun an lo nih theih nan India ram pumpui a state leh Union Territories-te chu hma la turin a hriattir a. He thuchhuah bawhzui hian Aizawl Municipal Corporation leh JB Foundation (A cause for Paws) chuan memorandum of agreement an siam.

Order hi August 22, 2025 khan tichhuakin, Municipal-a thuneitute chu a rang thei ang bera heng ui khawlaia tla; neitu neilo te dahkhawmna tur dog shelter/pounds buatsaih turin a hriattir bawk a, kar riat (8) chhunga report pe turin state sawrkar leh UT-te chu thu a pe a ni. 

Supreme Court chuan November 7, 2025 khan order tichhuak lehin, Municipal thuneitute chu sawrkar leh private zirna in zawng zawng, hospital (district hospital, primary health centre leh medical college telin), sports complex/stadium, bus terminal, relstation leh a chhehvela stray dog awm theihna reng reng vai a, thla thum dan a vawi khat tal heng hmunte hi thlithlai reng turin a hriattir a ni. 

He thuchhuah bawhzui hian October 30, 2025 khan Aizawl Municipal Corporation leh JB Foundation (A cause for Paws) chuan memorandum of agreement siamin, Lalremruata Kullai, Joint Municipal Commissioner, Aizawl Municipal Corporation leh Ramzirthangi, President/Founder, JB Foundation (A cause for Paws) chuan inremna thutlung an ziak a, kum khat chhung stray dog khuahkhirh leh thunun kawngah an thawk dun dawn a ni. JB Foundation Shelter, Bung Bangla, Tuirial-a mi chu stray dog mankhawmte dahna hmun tur atan ruahman anih thu Municipal Commissioner Joseph H. Lalramsanga chuan hemi ni vek hian hriattirna a tichhuak bawk. 

Supreme Court thuchhuak angin AMC chuan hma a la a, Aizawl Municipal Corporation huamchhunga stray dog vai tur Dog Catcher Squad din nghalin, December 4– 5, 2025 khan a thawhkhat nan survey an nei nghal a. AMC-in Ui (stray dog) mankhawm hna thawkin, JB Foundation hian a hmunhma tur a lo ngaihtuah a, Dog Catcher Squad-ten survey an neihnaah JB Foundation hian a pui thin bawk a ni.

Dog catcher squad hmalakna in ni 5.12.2025 khan ui, neitu nei a neitu in a thlauhthlak ni a rin, khawlaia khawsa report an dawn chu chhanchhuah nghal a ni. He Ui hi enkawlna tha dawng turin ni Dog Catcher Squad leader Dr. H. Lalbiaksangin JB Foundation kutah a hlan a ni.