Lionel Messi-a’n 2022 World Cup-a jersey a hak parukte chu New York-a Sotheby’s chuan lilamin $ maktaduai 7.8 (£ maktaduai 6.1)-in an hralh ta.

Messi-a hian a captain-na hnuaiah final-ah penalty pet hmanga France hnehin inelnaah khan an champion a ni.

Jersey an hralh takte hi final-a first half-a a hak te, semifinal, quarterfinal, last 16 leh group stage inkhel pahniha mite a ni.

Football khelhnaa hak kawr hralh to ber chu Diego Maradona-a’n 1986 World Cup-a ‘Hand of God’ an tih goal a thun tuma a hak kha niin £ maktaduai 7.1-in kum 2022 khan an hralh a ni.

Ballon d’Or vawi riat zet dawng tawh, Messi-a hi World Cup chanchina tum khat tournament-a group stage, last 16, quarterfinal, semifinal leh final-a goal thun vek thei awm chhun a ni.

2022 World Cup-ah khan Argentina inkhel vawi sarihah a khel kim vek a; mahse, group stage-ah khan Australian player Cammy Devlin nen Barcelona forward hlui hi an jersey an inthleng avangin group stage-a a hak pahnih chauh lilam theih a ni ta a ni.

Sotheby’s chuan, “Lilamnaa sum hmuh thenkhat hi Sant Joan de Deu Barcelona Children’s Hospital hnenah Leo Messi Foundation puihnain pek a ni dawn a, natna khirh bik vei naupangte tan a ni ang,” an ti.