Aizawl: Zirtawpni khan DoNER Secretary Naveen Verma, IAS leh officer dangte chuan Governor Lt. Gen. Nirbhay Sharma chu a chenna inah an kawm. Governor chuan DoNER Ministry official-te hnenah Mizoram hmasawnna atana pawimawh nia a hriat hmalakna tur rawtna hrang hrang a neihte a hrilh a. Mizoram chu lirnghing na tak tawk thei reng dinhmuna a din avangin chhiatrupna lo thleng thei laka invenhim nan Ministry of Home Affairs nen tawngkawpin building hlui zawk te chu thiat a, a thawm that theih apiang thawm that a nih theih nan Disaster Audit nei tura a duh thu a hrilh a. India hmarchhak state te chu khawchhak ramri depa awm leh chhuahka ber a nih dawn avangin Act East Policy tihhlawhtlin nan kawng tha neih a tul thu sawiin DoNER Ministry chuan kawng siam hna chu ngai pawimawh se a duh thu a lo hrilh bawk a ni. Naveen Verma chuan an kalphung thenkhat an sawi danglam thu sawiin DoNER atanga pawl anga zinin hmarchhak State te a mal mala an zirchian thu a sawi a. Project kal lai mekte tha taka an zawh thuai theih nan leh an dil belh mekte pawh a rang lama pawmpui thuai turin hma an la dawn tih a sawi rualin Utilization Certificate a hun taka hmuh a nih loh chuan hma lak a harsat tur thu a sawi a. Mizoram chuan hmasawn turin theihna a nei tha hle niin a sawi bawk. DONER Secretary hi Joint Secretary V.B. Pathak, IAS leh Joint Secretary J.K. Sinha, IAS ten an tawiawm a ni.