ZALEN November 24, 2025: Mizoram Civil Service Association (MCSA) Conference vawi 49-na, Aijal Club-a hman chu vawiin khan DP&AR Minister K. Sapdanga’n khuallian niin a hmanpui a, District inrelbawlnaah thuneihna sang zawk pek tuma hmalak a nih thu a sawi. 

Khuallian DP&AR Minister K. Sapdanga chuan state dang kalphung tha zâwk angin, mipuite tana awlsam nan leh rang zawka service pêk chhuah a nih theih nan District Administration-te chu mini-secretariat anga hnathawk (function) turin kalpui tum a ni a, Sawrkar-in hma a la chho mêk tih a sawi. 

Thil eng emaw tih dawn hlek a, thingtláng kilkhâwr zawk atanga Aizawl pan ngai kher lovin, District Headquarters-a tihfel mai theih turin power pawh hi semzai a ngai a, ‘decentralization of power’ tih dawn hian Sawrkar hnathawk thenkhat zingah pawh ui tlat, phal tlat lo, harsatna hlîr ngaihtuah a awm theih a, chung pawh chu ram tana tha tur a nih chuan kan pal luih deuh pawh a ngai ang, a ti.

MCS officers-te chu mi dang tana nu leh pa chan chang thiam zel tur leh MCS kherna leh sawiselna awmte chu kher lêt ve zel lovin, mahni insiamthat tûlna a awmna lai apianga insiam thatna atana hmang thiam turin a chah a. Mi dangin darkar 5 an thawh chuan MCS officer chuan darkar 7 thawh tur a ni. Mi dang aia thawh tam te, zaidam te, ngilneih te, tlâwmngaih te, rinawm te, hriatthiamna neih te, mi dang thawhpui thiam te, mi dang aia hriatna zau zawk neih te hi ‘premier service’ quality chu a ni, a ti.

K. Sapdanga chuan, "Kan rilru sûkthlêk leh mi dangte nen kan inlaichinnaah hian inti lal taka va rah beh a ngai lo va, kan thinlung leh mite thinlungah hnathawh leh nungchang hmangin ‘premier service’ tih hi tuh zawk tur a ni. Mi dangte aiin in nungchang hi miin an thlîr bîk a, mi dangin an tih, an sawisel lem lohah pawh MCS tih a nih chuan a langsâr hma bik thin. Vawi khat hming chhiatna neih tawh chuan, tui bua ruh harsa tawh ang hi a ni thin," tiin, nungchang uluk taka hman a pawimawh thu a sawi bawk.

DP&AR Minister hian MCSA buatsaih 11th Edition RAHBI Magazine a tlangzarh nghal bawk.