July 25, 2022; Eiruk thubuaia thiamloh chantir tawh Tuichawng bialtu MLA Dr. BD. Chakma, CADC CEM ni mek Budha Lila Chakma leh CADC executive member, MDC ni mek leh MDC hlui mi pakua, an vaiin mi 13 te chu, Special Judge (PC Act) chuan vawiin khan hremna puangin, kum 1 chhung jail tang tur leh Rs. 10,000 theuh chawi turin a ti a, hetihlai hian thiamloh chantir mi 13 te hi bail a chhuah nghal an ni. 

Vawiin a court in hremna puan ah chuan, thiamloh chantir mi 13 te chu kum 1 chhung jail tang tur leh Rs. 10,000 theih chawi tura tih an nih laiin, ni 90 chhung atan bail a chhuah lailawk an ni a, chumi atan chuan (bail bond) Rs. 20,000 theuh chawitir an ni.

Tarlan tawh angin, sawrkar sum eiruk thubuaiah CADC-a chief executive member (CEM) hlui leh Mizoram MLA ni lai Dr. BD Chakma leh CADC CEM ni lai Buddha Lila Chakma bakah, MADC-a MDC ni lai thenkhatte chu July ni 22, 2022 khan thiam loh chantir an lo ni tawh a.

Kum 2013-2014 vela Chakma Autonomous District Council (CADC) hnuaia development fund cheng nuai 137 chuang tihchingpen thubuaiah Aizawl District Court-a Special Judge (Prevention of Corruption Act) Vanlalenmawia chuan thutlukna a puang a, mi 13-te chu thiam loh a chantir a ni.