ZALEN, February 12, 2026: JP Career Point Coaching Centre chuan Higher & Technical Education Minister Dr. Vanlalthlana hovin tun hnaia Mizoram Public Service Commission (MPSC)-in Mizoram Combined Civil Services Exam 2025 result a tihchhuah taka an zirlai tling thar mi 10-te chawimawina hun an hmang.

Zarkawt, Aizawla awm, JP Career Point-in Nilaini zana Hotel Regency Conference Hall, Zarkawta officer-a tling an zirlai an chawimawite hi MCS-a tling thar pali, MPS pathum, MIS pahnih leh MF&AS pakhat an ni.

Khuallian Dr Mathlantea chuan officer tling tharte fuihna thu sawiin, lawmpuina thuziak a hlan a, zirlai hlawhtlingte hian an hlawhtlinna zinkawng an sawi hlawm bawk.

Kum 2013-a din, JP Career Point hian state danga coaching centre tha ber berte el pha turin state pawn atangin thawktu tawnhriat nei thate an chah lut thin tih an director, Israel Lalremruata chuan a sawi a; Mizorama zirtirna kalpui hmasa ber leh awmchhun an ni bawk. 

Combined Civil Services Exam bakah hian MPSC B (Gazetted & Non-Gazetted) Exam, Bank PO, Clerical, SSC atan coaching class an kalpui mek a. Mizoram Combined Civil Services Exam bikah an zirlai hlawhtlinna chang 79 (MCS 38, MPS 19, MF&AS 16 leh MIS pahnih) an nei tawh.

Kum 2025 khan an zirlai 210-in hna lak exam hrang hrang paltlangin hna thar an hmu bawk.