ZALEN November 18, 2025 : 2-Dampa (ST) Assembly Constituency Bye-Election a thlan tlin, Dr. R. Lalthangliana chu vawiin khan Assembly Speaker Lalbiakzama chuan Mizoram MLA ni turin rinawmna thu tiam tirin a lalut.

MLA thar lakluhna inkhawm hi Assembly Conference Hall-ah neih niin Lalthangmawia Addl. Secretary, Assembly Secretariat chuan a kaihruai a, he hunah han Speaker chuan MLA thar hi India Danpui hnuaiah rinawmna thu tiam turin a lalut a, MLA thar lakluhna hunah hian Chief Minister Lalduhoma, Home Minister K. Sapdanga, Health Minister Lalrinpuii, School Education Minister Dr. Vanlalthlana, Assembly Dy. Speaker Lalfamkima, Leader of Opposition Lalchhandama Ralte bakah MLA te an tel a. MLA atana Dr. R. Lalthangliana lakluh a nih hnu hian Seat 40 awmna Mizoram State Legislative Assembly-ah Mizo National Front (MNF) chuan MLA 10 an nei chhunzawm ta a ni.

Vawiin a MLA atana lakluh Dr. R. Lalthangliana hi August ni 6, 1956-ah Zotlang, Lunglei District-ah a piang a, a pa chu R. Dengchhunga (L) a ni. Kum 1982-ah Ngurmawii Sailo nen an innei a, fapa pahnih -Dr. Vanlalchhanhima Ralte leh Rev. Samuel Vanlalawmpuia (tunah Ph.D a ti mek) an nei. Dr. Thangtea te chhungkua hi Kohhran Ieh khawtlanga inhmang tak an ni a. A nupui Ngurmawii Sailo pawh MHIP General Headquarters, Aizawl-ah President term hnih, Senior Vice President-ah term khat leh Vice President-ah term khat chelh tawhin, tunah hian Vice President nihna a chelh leh mek a ni. An chhungkuain anmahni In Kanan veng, Aizawl-ah an cheng mek a ni.

Kum 1974-ah Serkawn Christian High School atangin HSLC a pass a. Kum 1978-ah St. Edmund's College, Shilong atangin BA a zo leh a, kum 1980-ah MA (Sociology) First Class-ah NEHU atangin a zo leh bawk.

Kum 1982-ah NEHU hnuaiah M.Phil Grade 'A' ah zovin. kum 1986-ah Ph.D a zo leh a. NEHU Sociology Department-ah M.Phil zo hmasa ber leh Ph.D Degree la hmasa ber a ni nghe nghe. M.Phil ah hian special stipend hmu phak khawpin a titha a ni. NEHU hnuaiah hian Mizo zinga Ph.D zo hmasa ber a ni bawk.

Lehkha a zir lai atanga ram leh hnam vei mi, Mizo zirlaite leh a bikin mahni hnampui zirlaite tana theihtawp chhuah thin a ni a. Shillong-a lehkha a zir laia Zirlai hruaitu nihna a lo chelh tawh thenkhat te -

1.President - AIl Mizo Students' Federation (AMSF), Shillong (1978 - 1979).

2 President - All Mizo Post Graduate Students' Union Headquarters, Shillong (1979 -1980).

3. First President - MZP leh AMSF Joint Headquarters infinkhawm (tuna Mizo Students' Union) Shillong (1979-1980)

4. India Hmarchhak State 7, Zirlai inzawmkhawm pawl - North East Region Students' Union (NERSU) dintu niin, Senior Vice President (1979-1981) a ni tawh.

5. Shillong MSU President (1980) a nih laiin, B. Vanlalzari dam chhung lung in tâng tur lak chhuahnaah a sulsutu ber leh Teipur Jail atanga la chhuaktu a ni.

Kum 1986-ah Mizo National Front (MNF) Party a zawm a, party chhungah nihna pawimawh hrang hrang chelhin Thalai (MNYF) President leh General Headquarters-ah Vice President nihna te a lo chelh tawh a, tunah hian Mizo National Front Senior Vice President ni lai a ni.

Dr. R. Lalthangliana hi term 6 zet MLA ni tawhin heng zinga term 3 ah hian cabinet minister a ni a, kum 1989 – 1993, 1993 – 1998 leh 2008 – 2013 khan MLA a ni a. kum 1998 – 2003, 2003 – 2008 leh 2018 – 2023 khan cabinet minister a ni.