ZALEN October 9, 2025: MNF Senior Vice President Dr. R. Lalthangliana, Dampa bial by-election a MNF official candidate chuan vawiin khan Bawngthah, Darlung, Bawlte leh South Sabualte a tlawh a, party hruaitute nen inkawmhona an nei a, bial mipuite thawhho puiah a sawm. 

Dr. Thangtea chuan, Dampa bial mipui hian hmasawnna kan thlahlel em em tih ka hria a, aspirational district aṭanga inkhai chhuah kan duh tak zet tih leh, hmasawnna (development) hmanga Mizoram hmel thlakthlengtu kan ni thei tih pawh ka hre chiang a. Kum 2028 Inthlanpui thlir ran chungin, Mizoram hmasawnna bung thar kaipuitu tur sawrkar thar kan din theih nan bial mipui zawng zawngte thawhpuiah ka sawm tak meuh che u a ni, a ti.

MNF Senior Vice President chuan, "Chuvangin he By-Election hi kan ram hma lam hun atan a pawimawh takzet a, chhenfakawm turin Mizoram hmel thar siam tura bul ṭan nan hmang ila ka duh hle a. Mizoram hmasawnna bung thar kan kai ngei theih nan leh MLA ni chunga Dampa bial hmasawnna hna ka thawh ngei theih nan khawngaih taka min vote ṭheuh turin Dampa bial mipuite ka ngen nawn leh a che u," a ti bawk.