Aizawl February 21, 2023: ZPM Thalai chuan Dr. R. Lalthangliana'n Hnahthial-a State Day a hmanpuinaa Mizoram ILP chu Mizoram Peace Accord hrinchhuah angin a sawi an ti a, hriatthiam har an ti a, pawmawm loha an ngai a, Peace Accord khan ILP hi a pawlh dal zawkah an ngaih thu an sawi.

Thuchhua an siamah ZPM Thalai chuan, MNF Ministry-a Minister zingah thiamna nei sâng leh tawnhriat ngah Dr. R. Lalthangliana'n hetianga ILP chungchang leh Peace Accord dawt thu hmanga a sawi zawm hi pawi kan ti hle a ni. Inner Line Regulation leh Inner Line Permit chungchang hi Bengal Eastern Frontier Regulation, 1873 para 2-ah tarlan daih tawh a ni a, Peace Accord khan a pawlh dal zawkah an ngaih thu an tarlang.

ZPM Thalai chuan, "MNF te'n inremna neih an chak tawh luatah 'Kan sa lu hawn tur' ti-a Pu Laldenga'n keipui sa hauh taka a hauh, Mizoram ramri chungchangah pawh Boundary Committee duh dan pawh dinpui ngam lovin, ramri atâna Mizo mipuite'n kan pawm theih loh North Eastern Areas Reorganisation Act, 1971 chu a rawn pawmpui ta a ni. Hei hi India sawrkâr laka Pu Laldenga a tlawm takzet zia tilangtu a ni," an ti. 

Thangtharte hi duh duha bum theih kan ni tawh lo a, zalenna sualtute-ah pawh ngaihsan tur leh ngaihsanloh tur kan thliar thiam tawh a ni tih hi ZPM Thalai ngaihdan a ni a; thangtharte hian tuna MNF Party hruaitute hi chu 'Nationalist'-ah kan chhiar ta meuh lo a ni.