ZALEN September 11,2025 : Dr R Lalthangliana leh Lalrintluanga Sailo chhungte chuan vawiin hian Dampa bial an fan an chhunzawm zel a. Heng khaw hrang hrang - Phuldungsei, Phulpui, Pukzing, Pukzing Vengthar, Hruiduk leh Marpara te an tlawh a ni.

Dampa bial MNF MLA candidate Dr Thangtea chuan, "Dampa Constituency hi Mamit District a awm in ni a. Mamit District hi Aspirational District-in ni a, opposition MLA ni chung pawhin tih theih tam tak a awm tih hi ka hria a ni," a ti. 

Dr Thangtea chuan, "By election-a ZPM candidate in thlantlin hian Ministry a khawih danglam dawn lo, a ngai reng dawn. Sorkarah nihna pawimawh zawng zawng an luah vek tawh a ni. Eng pawh nise, kan phu miah loh mah nise, Pu Rintluanga Sailo vanga kan ṭahna mittui min hruk hul pui teh u, tiin Dampa mipuite kan ngen a ni," a ti bawk.

He hunah hian Ex Minister, MNF General Secretary TJ Lalnuntluanga pawhin thu a sawi a. "ZPM thli a dik zawnga tleh kha tunah chuan an tana a tha lo zawngin, a lêt zawngin a tleh tawh a. Mipuiin an lam an hawi ta mang lo. Mipui an beidawng ta em em a ni. Tunah chuan MNF thli a dik zawngin a tleh ṭan mek a, MNF hmabak a eng ṭan leh mek a ni," a ti.