ZALEN June 16, 2024; Hmartlangdunga Maxi Cab Welfare chuan ni 18.6.2024 Thawhlehni khian Mualmam daia leimin, motor thahnem tak tanna thin chu thianfai turin hnatlang ang ko.

Hmartlangdunga lama Maxi Cab welfare te hi - Tuivawl Maxi Cab, Tuisualral Maxi Cab, Rungdil Maxi Cab Welfare thukhawmin an rel niin, Mualmam daia leimin avanga hun rei tak khualzin phur Maxi Cap an tanna thin chu thianfaia hnatlang neih an rel a. Thawhlehni zing lam dar 10:00 ah hna tan tum anih avangin hnatlang koh ni a Mualmam leiminna hmun paltlang turte chuan hnatlang te ti buai lo zawnga hun hman sak turin an ngen a ni.

Maxi Cab Welfare ten thuchhuah intawm an siama an tarlan danin, Hmartlangdung kawng, an chak lakna leh kan zin veivahna ber thenfaina lam, a chak tawk lo chu pawi an tih thu an sawi a. Mipui zin veivakte thlamuang taka an zin veivah theihna anih beiseiin hnatlang hi an rawt anih thu sawiin, mipuite tawiawmna an ngen bawk.

Thudawn danin, Mualmam leimin hi Aizawl atanga km 46 vela hla, Sesawng khaw pelh lawk a awm a ni a, Cyclone Remal siper in a ken tel ruah leh thli avanga lei hi min a ni. Leimin hi kawngchhak atanga rawn tla thla a ni a, meter 20 vel kawng a hnawh a, PWD lamin JCB nen thenfai hna thawk mahse, an hna a muan avangin an zo hleithei lova. Lei paihtu motor ten kawngah leivung an thlauh tel avangin kawngpui dung a ti nal a, hei hian harsatna a thlen belh bawk. Bungraw phur motor lian te pawh zan riah chang an nei tam. Kawng nal avang hian Motor lian kawngthlangah a tlak changin kawngpui a hnawh a, rei tak tak khualzin motor an din phah thin. Mihring tan pawh kal harsa tak a nih thu Maxi Cab khalhtute chuan an sawi.

Hmartlangdunga Maxi Cab neitu intelkhawm inthurual chuan chak zawka kawng thenfai hna thawh a nih theih nan motor service lova thawhchhuah an rel ta a ni. Maxi Cab intel khawmah hian Tuisualral Maxi Cab Welfare ah member 20 an awm a, Tuivawl Maxi Cab Welfare ah member 19 awmin, Rungdil Maxi Cab Welfare ah member 10 an awm bawk a ni.