ZALEN March 15, 2026 : Kumin sawrkar kum kal mekah damdawi ruih theih kaihhnawihah drugs licence pali suspend a ni tawh a, drugs licence tihtawpsak (cancel) 11 an awm tawh bawk.

ZALEN-in Health Department hnuaia Food & Drug Administration (FDA) thawktute hnen atanga thu a dawn danin damdawi zuar zingah dan bawhchhiaa damdawi hman sual theih zuar man chhuah an awm zauh zauh reng a. An bawhchhiat dan azirin an licence suspend emaw, cancel emaw a ni thin.

Tun sawrkar kum kal mekah hian damdawi ruih theih kaihhnawihah licence pali suspend a ni a, an zinga pathum chu Aizawla awm an ni a, pakhat chu Aizawl pawn a ni.

Hei bakah hian licence 11 cancel a ni a, chung zinga pariat chu Aizawla awm niin, pathum chu Aizawl pawna awm an ni. 

Licence suspend emaw, cancel emaw hi thil namai a ni lo va, cheng nuai tam tak senga kum tam lo kalpui tawh an ni tlangpui a. Dan bawhchhiate hremna hi licence cancel emaw, suspend emaw a ni ngawt lo va, Drugs Rules, 1945 chuan court case siama penalty a pek ang tantir leh pawisa chawitir tura hmalak chu an tih dan tlangpui niin an sawi a. Loh theih loh atan prosecution hi dah a ni thin a, kumin prosecution siam a ni lo niin an sawi.

FDA thawktute chuan damdawi leh ei/in quality enkawl hi an dinchhan leh a hnapui ber pakhat a ni tih an sawi a. Damdawi & food quality tha lo hi thihna hial thlen thei a ni a, a dap chhuah hna an thawk reng thin.

State Drugs Testing Laboratory (DTL), MINECO chu tun atanga reilo teah function tan tuma buatsaih mek a ni. 

Damdawi sample-te chu Regional Drugs Testing Laboratory, Guwahati (Central)-ah leh private laboratory dangah thawn rih a ni a. Tun financial year chhung hian sample 506 thawn a ni tawh a, result dawn chinah sample 15 quality tha lo an awm a. Food Testing Laboratory (FTL) hi Zemabawkah kalpui mek a ni a. Aizawl leh Lungleiah Food Safety on Wheels (Mobile Testing Laboratory) pakhat ve ve dah a ni a, hei hian test a ni bawk.

Tun financial year chhung hian food sample 730 test a ni a, Aizawla FTL bakah private food laboratory dangah tih a ni a. Result hriat chinah pathum chu quality tha lo an ni. 

Thawktute chuan damdawi ruih theih hman sual ven hna an thawk bawk a. Damdawi pawimawh zingah ruih nana hman theih eng emaw zat chu Drugs Rules, 1945 chuan Schedule X (drugs with high potential for abuse and dependence) leh Schedule H-1 (habit forming drugs)-ah a dah a. Mizorama hmuh theih lar zual damdawi 15 thlang chhuakin fimkhur taka kawl leh hralh a nih theih nan wholesaler leh retailer-in an kawl theih zat bithliahna siam a ni a, a zuarte an fimkhur phah hle tih an sawi. 

FDA hian licence leh registration chi hrang hrang pe chhuakin a enkawl zui a, chungte atang chuan tun kum kal meka revenue a hmuh chu Rs. nuai 37 a tling tawh.

Damdawi zuarten dan pela damdawi an hralh thin tlanglawnte hi khuh damdawi, Alprazolam, Diazepam, Tramadol, Dicyclomine te an ni.