ZALEN November 16, 2025: Hun eng emaw chen Greater Aizawl Water Supply Scheme (GAWSS) Phase III atanga tui pump theih loh chu siam that a nih tawh avangin a pump tan leh tawh a ni a. Aizawl khawpui hnianghnara tui pe turin ni tin tui 40 mld vel a ngai.

ZALEN-in PHE thawktute hnen atanga thu a dawn danin May 26, 2025 tlai dar 5:20 vela Phase III chawmtu transformer a chhiat vang leh Vaivakawn Zohnuai lei tlakhniamna hmunah June 2, 2025 a tui a put avangin hun eng emaw chen tui pump hi a khaihlak a; mahse, kar kalta Zirtawpni khan tui pipe chhia hi siam that a nih tak avangin dan pangngaiin tui pump leh theih a ni a. Hei vang hian Aizawl khawpui tui harsatna zualpui pawh a ziaawm a, hun rei lo tê-ah dan pangngaiin tui sem leh theih beisei a ni tih an sawi. 

PHE department thawktute chuan, “Phase III atanga tui pump theih loh lai khan Phase I leh II atangin kan chawm tel a ngai a. Hnianghnara tui sem tur hian ni tin tui 40mld vel a ngai a; mahse, Phase I leh II atang hian ni khatah chawhrualin tui 28mld vel kan pump thei a. Hei vang hian mipui hnenah tui hniang hnarin kan sem thei lo a ni,” an ti.

Phase III atanga tui pump theih a nih takah chuan mipui hnenah pawh zing zawka tui sem theih an beisei tawh tih sawi bawkin, “Line chhia leh thil dang harsatna kan tawk lo a nih chuan thla khatah vawi thum, ni 10 dan velah tui hi consumer pakhat zel hnenah litre 3,500 chu pe thei turah kan inngai a. Phase III atanga tui pump theih loh lai kha chuan tui kan pek pawhin consumer pakhat hnenah tui litre 2,500 vel kan pe thei a. Tui a haw khât chuan mipuiah harsatna a thleng ve zel a, kan sem ngun theih chuan kan ziaawm chhoh zel kan beisei a ni,” an ti bawk. 

GAWSS Phase I atang hian ni khatah tui 10.8 mld leh phase II atangin ni khatah 24 mld pump theih a ni a; mahse, nilenga pump theih a nih loh avang leh mipui hnen a thlen hmaa tui bothlau a tam avangin hnianghnarin tui hi an la sem thei lo niin an sawi.

GAWSS Phase III atang hian ni khatah tui 37mld pump theih a ni a; mahse, a dahkhawlna hmun a awm that loh avangin heti zat hi pump theih a ni lo tih an sawi bawk a. Tun dinhmunah Aizawl khawpui tuilakna Tlawng tui a tam vangin harsatna an tawk lo tih an sawi bawk.

PHE department thawktute chuan tun dinhmunah GAWSS Phase I atangin ni tin tui 10mld, Phase II atangin 19mld leh Phase III atangin 8mld vel chawhrualin an pump thin tih an sawi.

PHE chhinchhiahna hnuhnung berah chuan Aizawl khawpuiah consumer mi 85,442 an awm mek a, tui connection hi favangah chuan a pung tam zual thin niin ZALEN an hrilh bawk.