Central sawrkar chuan tunhnai khan  budget sumah Hmarchhak  state te chu 50% intum turin a ti a, a huhang a nei lian hle a, Hmarchhak titi ber a ni mek. Hetiang hi a thleng dawn tih hriain Hmarchhak CM \angkhawm chuan state in a tum tur tihsan an duh lo hle a, PM Modi an kar nasa hle a, beiseina leh beidawnna inkarah Mizoram chu hun engnge maw chen a awm a ni. Kum khat a eiral 10% chauh intum \hin 50:50 a ni ta thut chu mipui pawhin an ngaihven a, chawmhlawmin kum 30 chuang sawrkar a kal tawh a, a let 5 laia an sang hi chu ram hruaitute pawhin an huphurh niin a lang a, mipui pawh a ruk tak chuan an chiai a ni. Tuna a landanah chuan Centrally Sponsored Scheme (CSS) hman rei tawhte chu 50:50 tur zingah an awma, CSS thar te chu Central in 100% a la rawn tum dawn a, sector \henkhat chu state sawrkar hnenah mawhphurhna a pek a nei bawk. State dang te chuan thawhchhuah neiin budget ah pawh 3/2 lai state sawrkarin a tum te pawh an awm  a ni. Zoram hian thawhchhuah nei se tun dinhmun hi a awm a nih pawhin harsatna a pumpelh thei a. Eng pawh chu nise a nih tur ang a ni zo tawh a, hmachhawn a ngai a, pumpelh theih a ni lo. He thutlukna hian Mizoram tan mellung a phun dawn chiang a, rilru puthmang a zirin thil \ha zawk a nghawng chhuak thei a, chawr chhuah nana chona petu a nih rualin, a chhe lamah ram a hnuk lut thei bawk. Mizoram \han theih lohna sawi \hin te chu  a hmun a kil khawr tih te, tlangram  a ni a inkalpawh a har tihte a ni a, thliar kar  anga sawi a ni fo \hin bawk Inner Line Permit hmanga hung bing a ni bawka, luh hmaa lehkha pawimawh lak kher an ngai bawk nen a tlawhtute pawh hna leh \ul dang vanga lo lut  an ni a. Khawhawi a zau thei lo a, khawvel pang pera ar hmai tiat lek  ram hi khawvel ram dang awmdan emaw titu tam tak an awm. Zoram inrelbawlna mumal taka din hma leh hnuah pawh chawhlawm a la ni ta zel a, harsa lem lovin mipui an awm a,‘a awm leh mai ang’  tih rilru pu in thlamuang takin mipui an awm a, hei hian thatchhiatna a hring chhuak a, awlsamtea sum hmuh tumna a intuh nghet hman hle a. Mahni thawhchhuah mila khawsak ai chuan a thlawna dawn tum an tam ta hle mai. Sum a tlem emaw a tam emaw inrenchem hi khawvel kalphung a ni hrim hrima, uikawm nihna ni lovin mihring pangngai zia a ni zawk a. Sawrkar pawhin thuchhuah siamin tun hmaa pawmzam \hinte chu a theih dawn tawh loh tiin sum inrenchem a keng khawng viau a;  chhunzawm a tum niin a lang bawk. Ziak leh chhiar tamna Ram ni mahse thiamna sang tak nei, chhawrtlak tamna ram a ni lo leh lawi si a;   thiamna nei te chuan hna an hmu hlei thei loa, a remchangah an in vawm bei vel mai mai a; a \hen ram dangah hna an thawka, Mizoram harsatna hi sawi sen a ni lo. Sum hmuhna a nih chuan tam zawk chuan chawmhlawm nih an zak tawh hauh loa, chutih rualin mahni kea din tum te’n hun \ha an nei mang lo leh lawi a. Mizo pi leh pute kha mahni kea dingin an intodelha, an thlah kal zel te hi engvanga inthlak danglam nge ni ang le? Ram hruaitute mawh nge mipui? tih inzawt ila a chhanna a in ang lo nuai mai thei. Thil chiang pakhat erawh chu kum 30 chhunga sum management  a chhia inbengkhawm chuan State Sawrkar -ah harsatna a thlen a; sum harsat  lai taka sum inpek dan tih danglam hian harsatna thlen belh mahse intodelh turin fiahna a inchhawpah ngaih mai tur a ni a. Chawm hlawm kum khua tur chuan tu ram mahin tlin ngaihna a awm lo tih hi tuna thil thleng hian     a tichiang hle a;  a tak ram  Zoram chuan a  tem \an tihna a ni. Tun dinhmun hi puitlinna kawng zawh hautakzia a taka zirtirtuah a chang thei a; chhiatna khur thukah  a luh theih bawka, duhthlanna a zir a ni ang.