Joseph Lalthankhuma telna, North East Zone chuan an lo inrin lawk ang ngeiin Duleep Trophy-ah North Zone an hmachhawn dawn tih a chiang ta a. Zone huphurhawm ber pawl hmachhawn tur ni mah se Mizo tlangval a zam lo.

Board of Control for Cricket in India (BCCI)-in India rama cricket inelna ngaihhlut hlawh a buatsaihah hian India ram pum chu zone parukah thenin Mizo tlangval, Joseph-a hi India hmarchhak state parukte aiawh tura thlan chhuah player 15 zingah a tel.

June 28 atang hian Karnataka khawpui, Bengaluru-a M.Chinnaswamy Stadium-ah North Zone hi an khel dawn a, zone paruk zinga tha ber pawl an ni a; mahse, Nagaland-a North East Zone camp-a awm mek Joseph-a a zam lem lo.

Zirtawpni tlaia an hmachhawn tur a chian hnua ZALEN-in a biaknaah Ramhlun Venglai Cricket Club batsman, “A hminghmerha en chuan India tual chhung inelna leh khawvel huap (international) thlenga khel tawhte an ni a; mahse, game a nia, engmah a hriat loh,” a ti.

North Zone hi Duleep Trophy-a chuan zone hlawhtling ber niin huphurhawm tham an ni a. Ranji Trophy khel thin team pasarih - Delhi, Haryana, Himachal Pradesh, Jammu & Kashmir, Punjab leh Services atanga thlan chhuah an ni a. Vawi 17 zet champion tawhin champion ngun ber an ni a, 1990-91 leh 1994-95 chhung a zawna vawi nga champion niin champion zawn rei thei ber an ni bawk.

A khelhna club tana middle order batsman rinawm, Joseph-a hian a hmain Duleep Trophy chu Mizo zinga khel hmasa ber nih ngei a tum thu a lo sawi tawh a, “Ka tel a ni tih ka hriat tirha ka rilrua lo awm nghal chu, ‘Squad tikimtu mai ni lovin, Mizo zingah khel hmasa ber nih ka tum ve tlat a ni,’” a ti.

Player 15 thlan zingah khelmuala lut tur 11 thlan chhuah leh chhawn zinga tel phak ngei tumin a inbuatsaih a, tan a la tih a sawi.

Hmarchhak aiawh tura thlan zingah Joseph-a chiah hi Mizo a ni a. Manipur-in thawh hnem berin panga an thawh a, Meghalaya leh Nagaland-in pathum ve ve, Sikkim-in pahnih leh Arunchal Pradesh leh Mizoram atangin pakhat ve ve thlan an ni a. Hmarchhak state zinga mi, Assam leh Tripura chu East Zone-ah an tel thung.

Inelna an hmachhawn turah hian chak lo an tla nghal zel dawn a, Test Match anga khelh tur niin team khatin thawh (innings) hnih zel an nei a, ni li chhung (international Test Match-ah ni nga) an khel dawn a, Joseph-a te hian North Zone hi June 28 atanga July 1 chhung an hmachhawn dawn tihna a ni.

North East Zone hian North Zone hi an hneh chuan July 5-8, 2023 chhungin M.Chinnaswamy Stadium-ah South zone hmachhawnin semifinal an khel ang.

NORTH EAST ZONE SQUAD:
R. Jonathan (Nagaland), Captain
Nilesh Lamichaney (Sikkim), Vice captain
Kishan Lyngdoh (Meghalaya)
A.R.Ahlawat (Arunachal Prades)
Joseph Lalthankhuma (Mizoram)
Prafulamani(Manipur)
Dippu Sangma (Meghalaya)
Jotin Pheiroijam (Manipur)
Imliwati Lemtur (Nagaland)
Palzor Tamang (Sikkim)
Kishan Sinha (Manipur)
Akash Kumar Choudhary (Meghalaya)
Rajkumar Rex Singh (Manipur)
Nagaho Choshi (Nagaland)