Aizawl June 20, 2024 : AMC Mayor Lalrinenga Sailo chuan Durtlang kawng chho a lei laih chungchangah hian a dik a tawk pawh thlu lova AMC beihna a awm fo avangin a nihna puanchhuah a tul a ti a, helai hmuna H. Zodinsangi, Zotlang, Aizawl in lei a laih chungchanga a phena Aizawl Mayor awm anga sawi hi thudik lo hulhual a ni, a ti.

Aizawl Mayor hian Durtlang kawng chhak lama lei laitu hi a mi hriat ngai an nih loh thu a sawi a, social media lama amah an puhna te a darh nasat em avangin H. Zodinsanga nuta te pahnih pawh thupha chawiin an rawn leng hial niin a sawi.

Leilaih chungchangah AMC-a inrawlh loh thu sawiin Lalrinenga Sailo chuan, "Dilna hi SD&SM Regulation in a phut angin, Independent Body, Geologic Review Board (GRB) in a endik a, phalna pek a remti a ni. GRB member te hi leilung chungchanga thiamna bik nei, AMC mi leh sa ni lo vek an ni. Chuvangin, an thutluknaah AMC a inrawlh ngai lova, a inrawlh thei lo bawk a ni," a ti.

Lalrinenga Sailo chuan Helai hmun hi Protected Area huam chhung a ni lo va, Protected Area Sector I leh II inkara awm a nih thu sawiin, H. Zodinsangi hian Bawngkawn (Durtlang Road), Haflong chhaka Petrol Pump tur lei laih hi ni 24.4.2023 khan AMC ah a dil a. A hmunah AMC chuan enfiahin, GRB thutlukna siam turah a dah a ni a ti. GRB meeting hian hemi chungchang hi tum hnih a ngaihtuah hnuah structure tha zawk duang turin a diltu hi hriattir a, a dilna hi GRB meeting vawi 33 na May 31, 2023-ah ah approved a, July 3, 2023 khan Phalna (Permission) pek a ni, a ti bawk

Mayor chuan H. Zodinsangi hian kum 2017 khan lei laih phalna hi Directorate of Geology & Mineral Resources (Directorate of Geology and Mining ni ta) atangin a hmu tawh a, District Magistrate, Aizawl DC atangin No Objection Certificate (NOC) a nei a. HQ 74 RCC (GREF) hnen atangin Right of Way (kawng kam hman phalna) hi a nei bawk tih a sawi.

AMC-in October 29, 2021 atanga AMC (Site Development & Slope Modification) Regulations, 2017 a hman tak avangin dilna hran a rawn siam leh chauh zawk a ni, a ti bawk.

Lalrinenga Sailo chuan, "In sak leh lei laih kawngah nasa takin dan anga hmalak a ni a, AMC official te pawh an hah a ni tih kan hriatpui a tha. Mi luhlul fal tlemte, tu tute emaw avanga AMC dem vak mai zel hi a dik ber ang em? State dang a an tih dan kan sawi ang hian khawng leh khauh takin AMC hian rorelna kalpui ve tak tak ta sela mipuiin kan zo ang em? Mizo mipuite tan a tha ber ang em? Mipuiten i ngaihtuah ang u," a ti bawk.