Aizawl; Environment & Forest deptt. buatsaih, Durtlang kham leh a chhehvel cheibawl, siamthat leh humhalhna tur ‘Unique Landscape Development Programme in and Around Durtlang Kham’ chu nimin khan Leitan YMA Hall-ah Chief Minister Lal Thanhawla’n a hawng. Chief Minister chuan Durtlang kham leh a chhehvel ram chu Aizawl hmar lama hmun thengthaw nuam leh mawi kan la neihchhun a nih thu leh tichereu theitu leh kangmei laka ven a tul thu a sawi a. Siamthat leh humhalh hna pawh sorkarin a ngaipawimawh hle tih sawiin, Local Council ten neitu rilru pua an ram enkawl theuh thehchhuak a, phur taka pen chhuah avangin lawmthu a sawi a. "Ram kan neih ang chhunte hi kan tan vek a ni tih hria a, neitu nihna chan changa kan cheibawl hi kan tih tur a ni," a ti. Kum 2008 khan Aizawl Development Authority (ADA) nen helai ram hi cheibawl a, khawthlir tinuamtu atan Bawngkawn leh Durtlang inkara In hmun pek tawhte pawh cancel theih a ni em tihte an sawiho thu Chief Minister chuan a sawi a. "Tan la viau mah ila, a tihpuitlin theih ta lo a ni," a ti a. Ram chu Lapa ta anih angin A duhdana kan cheibawl hi mitin tih tur a ni a ti bawk. Hawnna inkhawm hi Home Minister R Lalzirliana leh Environment & Forest Minister Lalrinmawia Ralte ten an hmanpui bawk a. E& F Minister Minister chuan Durtlang kham hi hring mawi taka cheibawl tum a nih thu te, cheibawl leh humhalh dan turte pawh mumal taka duan a ni tawh thu te leh, hemi atan hian central sorkarah Environment & Forest Director General pawh an hmuh tawh thu a sawi a. Ram neitu dik tak mipuiten mahni ta a ni tih hriat thar a tul tih a sawi. Durtlang kham leh a chhehvel cheibawl hna hi Durtlang, Leitan, Bawngkawn leh Chaltlang Local Council ten an thawk ang.