Zothan Autoworks Pro Volleyball League 2022 khelh mekah nilaini zan khan R Dengṭhuama Indoor Stadium, Mualpui-ah Huntharin an harsatna su kiangin 25-14, 29-27, 25-17-in an chak a, Pro Volleyball chanchina Durtlang North an hneh hmasak ber tum a ni bawk. Huntharin hian semi-final lut thei turin rahbi an tuk chho mek zelin set thum faiin Durtlang North an hneh.

Lalramnunfela'n vawi hnih champion tawh Hunthar tanpuiin fel fai takin a khel a, D3 Business Player of the Night nih phuin point 12 hmuin point khat chiah a paih a; Haryana atanga an lak luh Gagan Kumar chuan point 17 thawk chhuakin vawi kua a tisual ve thung.

2018 atangin Pro Volleyball-ah Durtlang North an tel a, Hunthar nen vawi thum an insutna niin league inkhelah vek a ni a, set thum set hniha vawi hnih an chak zawn tawhna chhunzawm thei lovin set khat mah la lovin an tlawm.

Durtlang North hian an khelh hmasak berah championship hnuhnung ber 2019 final-a an hneh loh Chhinga Veng Spikers laka an tlawmna chhang letin set thum set hnihin an chak a, Hunthar hmaa hnuhma tha an neih kalpui turin rin hlawh mah se a tir atangin an tlahniam.

Huntharin an hneh loh thin Durtlang North lakah harsatna an tawh thin an tidanglam a, inelna sangah fiahna an pal tlang thei. Tuichangral an hneh tum aia mittlung zawkin inkhel an thunun a, vawi hnih an khelh tawhah chak ve vein semifinal an hnaih.

Set hmasa berah Hunthar spiker Laldensanga a langsar a, vawi hnih a vuak thlak zawn hnuah 20-14-in hma an hruai fal. Lehlamin point an hmuh belh tawh lo va, Rama hovin net bulah Huntharin Durtlang North rinrawl Sagar Malik an dang hneh hle a ni.

Set hnihnaah Sagar chuan awmze nei zawkin a khel thei a, Durtlang North nawr kalin tlang thei turin 21-16-in hma an hruai hman. Mahse, boruak sangah Hunthar an hriam a, lehlamin harsatna tawkin Fabian Lallunghnema'n a vuak kai loh hnuah 24-23-in hma an hruai let.

Tlar hnung atangin Sagar chuan a hlap tla a, Durtlang North-in 24-24-in an nih rual ve leh a, vawi li an deuce zui. Hunthar sang zawk zelin 27-27 a nih laiin Gagan chuan point hnih a hmu zawm a, inbeihna nasaah dingchangin set hnih faiin hma an hruai.

Inrintawkna nen mar takin Huntharin an khel zui zel a, set thumna tirah setter Remsangzuala'n point hnih a hmuh zawn hnuah lehlamin tum hnih tisualin 4-0-in hma an hruai.

Durtlang North an talbuai a, Chhinga Veng an hneh tuma che tha tak Fabian-a la chhuakin captain Zomuanpuia'n thlak mah se nuam ti taka khel tluan thei Hunthar an su nghing zo chuang lo a ni. Vawi thum champion an tumna puitlin thei tur khawpin Hunthar an inlan a, Gagan leh Rama bakah Densanga'n point 11 hmuin tum hnih chiah a tisual a, Zomuansanga leh Lalnunfela'n hma an sawn bawk.

Durtlang North tan Sagar chuan point 16 hlawh mah se 12 a paih a, Vanlaltanpuia'n point sarih hmuin point li a hloh. Fabiana'n a hma a pha lo lehzual a, point ruk a thawh chhuah chanve a paih a, Lalbiakmuana'n beisei pha lo zelin vawi li a hlap tlak laiin tum thum a tisual a ni.

Huntharin khelh thum chak zawn tumin kar leh thawhtanni zanah vawi hnih tlawm zawn mek Chhinga Veng an khelhpui leh dawn a; thawhlehniah insiam thar tumin Durtlang North-in Tuichangral an hmachhawn ang.

D3 Business Player of the Night
- Lalramnunfela (Hunthar)

Play stats :

HUNTHAR
Lalramnunfela : point hmuh 12, point hloh 1
Gagan Kumar : point hmuh 17, point hloh 9
Laldensanga : point hmuh 11, point hloh 2
Zomuansanga : point hmuh 6, point hloh 5
Lalnunfel : point hmuh 4, point hloh 2

DURTLANG NORTH
Sagar Malik : point hmuh 16, point hloh 12
Vanlalṭanpuia : point hmuh 7, point hloh 4
Fabian Lallunghnema : point hmuh 6, point hloh 3
Vanlalmawia : point hmuh 5, point hloh 3
Lalbiakmuana : point hmuh 4, point hloh 3

FIXTURE :
May 13, zirtawpni -
3pm : Kanan v Bethlehem Vengthlang (hmeichhia)
8pm : Durtlang v Bungkawn (hmeichhia)