Kanan nula ten inkhel tha takin bul an tan a, thawhlehni tlai Zothan Autoworks Pro Volleyball League hmeichhe inkhel hmasa berah set thum faiin champion lai Durtlang an hneh. R Dengṭhuama Indoor Stadium, Mualpuiah Kanan tan Mizo zinga India senior team tana koh awm chhun Vardingliani a langsar a, a team-te 25-21, 28-26, 25-14 (3-0)-a chak puiin player of the match-ah thlan a ni.

Pro Volleyball hnuhnung ber 2019 khan Durtlang an champion a, hemi kum October 25-ah an President Pu R Lalnunsanga chuan chatuan ram a pan. President dang nei zui lovin championship an hmachhawn a, inkhel tan hmaa amah sunna hman a nih rualin a pualin an khel dawn tih an sawi.

Lusun chunga inkhel Durtlang tha a tho zo lo va, a bet zawkah ṭang nghalin set hmasa ber an hloh. An khelh chhungin Lalramliani'n point 12 hmuin point nga a hloh a, captain Lalawmkimi Khenglawt chuan point sarih thawk chhuak bawkin set hnihna la thei turin 26-25-in an sang hman. Mahse, L Sangzuali'n vaw tlain lehlamin an nih rual hnuah Awmkimi'n a vaw kai lo va, B Tlangmawiin hlap tla ve lehin Kananin boruak sang leh harsa an pal tlang.

Set thumnaah Durtlangin awmzia an nei pha tawh lo va, Kananin 14-4-a hma an hruai hnuah veteran Dingdingi'n point a hmu zawn chho char char a, hneh taka inkhel awpbetin Durtlangin point 14 chiah an hlawh hman a, set la lovin an tlawm. Kanan tan Dingdingi bakah Tlangmawii'n point kua hmuin tum riat a tisual a, Sangzuali'n point sarih hlawhin point nga a paih bakah C Lalnunpuii'n point ruk thawk chhuakin tum nga a tisual a ni.

Zanin dar 8 atangin Bungkawn leh Bethlehem Vengthlang an inkhel ve leh dawn a, hmeichhe team pali an inlan kim chiah ang. Kanan-in zirtawpni tlaiah Bethlehem Vengthlang an khelhpui leh dawn a, hemi zanah hian Durtlangin 2019 final-a an hneh Bungkawn an hmachhawn ang.

D3 Business Player of the Match
- Vardingliani (Kanan)

Play stats :

Kanan
Vardingliani : point hmuh 25, point hloh 6
B Tlangmawia : point hmuh 9, point hloh 8
L Sangzuali : point hmuh 7, point hloh 5
C Lalnunpuii : point hmuh 6, point hloh 4

Durtlang
Lalramliani : point hmuh 12, point hloh 5
Lalawmkimi Khenglawt : point hmuh 7, point hloh 0
CS Zonunmawii : point hmuh 5, point hloh 3
Lalhmingṭhai : point hmuh 4, point hloh 3

Fixture
May 11, nilaini
8pm : Durtlang North v Hunthar (mipa)

May 12, ningani
8pm : Tuichangral v TNT (mipa)

May 13, zirtawpni
3pm : Kanan v Bethlehem Vengthlang (hmeichhia)
8pm : Durtlang v Bungkawn (hmeichhia