Aizawl July 29, 2022 : Vawiin khan Durtlang atanga Sihphir inkal pawhna kawng siam chu ZPM Working President K. Sapdanga, hovin ZPM Media, IT & Publicity Department chuan an enfiah a, K Sapdanga chuan, he kawng siam a nih dan leh hna thawh muang lutuk chu a ngaimawhawm thu leh contractor hi The New Kamrula tia a hming an lo phuah fiam hial tawh niin a sawi.

K. Sapdanga chuan, "Durtlang to Sihphir kawng laih zauh hi Kumin March 11 khan ropui takin CM-in hna bul tan theihna chu a hawng a. Hna tan theih hnuah thla li dawn an han chawl leh phawt a. Hna an tan mai theih loh chhan chu contract thuthlungah Mizoram state sorkarin senso a lo pe phawt ang a, kum khatah vawi li (quarterly)-in Utilisation Certificate a siam chin zel kha Central Road Infrastructural Fund-in an rawn pe tur a ni. Hna bul tanna hi state sorkarin a neih remchan loh vang a nih hmel ber. Hetih lai hian contractor SLT Infracon hi Mizoram sorkar Treasury lamah chuan an che thei hle a, ni khatah bill 9 te an lehlan theia sawi a ni a, The New Kamrula tiin an hming an lo phuah fiam hial tawh a ni. Hna erawh an thawk muang hle," a ti. 

ZPM Working President chuan, "Tunah hian Vaivakawn lamah leimin vangin lifeline kawngpui khar a ni a, phai lam atanga lirthei lian leh te chu Sihphir lama kal vek tura tih a nih tak avangin Home minister hova thukhawm chuan, Aizawl - Kawnpui via Sihphir chu motor veivah theih tura lo thianfai turin, contractor SLT Infracon chu a hriattir a. Lirthei veivak control turin trafic management a awm leh si lo a, Sihphir khawtlang tlawmngaiin zan rei tak thleng an duty ringawt mai a, hei hi enfiah thuai a tha hle a ni. Tunah furpui kan thleng mek a, he kawng siam hian mipui tan harsatna a siam nasa ta hle a, hnathawktute hian hmanrua an chhawp tlem hle a, hna hi a hun taka zawh a nih theih nan, Mizoram sorkar hian chak zawkin hma la turin kan ngen a ni," a ti bawk.