ZALEN Jan 23, 2026: Vawiin khan Central YMA Road Monitoring Committee Member te chuan Durtlang - Zanlawn BRTF kawng siam mek chu Lungdai Khawtlang atanga sawiselna an dawn avangin a hmunah an enfiah.

Kawng siam mek hi Lungdai khawtlang - Village Council, YMA leh NGO dang ten a hmunah nitin an vil chungin, kawng siamtute hian tha tawk turin an thawk lo niin an hria a. An lungawi lohna hrang hrang te chu, Central YMA Road Monitoring Committee hnenah an lo sawi a. Chumi hnuah BRTF leh a Contractor aiawh te chu koh niin, eng vanga kawng hi siamtha lo nge an nih tih te an zawt a. An kawng siam tawh chu a hmunah enpuiin, a tha lo ngei a ni tih finfiah a ni a. Hmun thenkhat a an kawng hnawhte chu kut pawhin a khawh hlawk hlawk theih a ni. An kawng siam chhiat avang hian tukinah ringawt pawh, lungṭhilah 2-wheeler 4 laiin an tluk phah nghe nghe a ni.

CYMA Road Monitoring Team chuan BRTF leh Contractor te chu hetiang hian ruahmanna an siampui nghal a ni.

1. Duhthusam a thain hna an thawk chhunzawm tawh tûr a ni.

2. Lungdai area a an hnathawh tawh zawng zawng chu an nawr khawk leh vek ang a, an siamtha leh ang.

3. Kawng siam chhunzawmna tûr Bitumen Concrete (BC) truck trip 3 chu a daih tawh avangin a hman tlak tawh loh a, an paih vek ang.

4. An kawng siam tawh sa hi Sealcoating an ti leh vek ang.

Central YMA Road Monitoring Committee atangin R.S Lalrinsanga, CEC leh Dr. K.T Pakhuangte, CEC te an kal a. Lungdai Village Council leh YMA bakah NGO hruaituten an lo dawngsawng a ni.