Tata Yodha 4x4 LPS Pro Fight champion C Lalhruaitluanga leh pahnihna HC Lalramfela hnenah Deputy Chief Minister Pu Tawnluia'n Rs 1,50,000 a hlan.

Pu Tawna hian tukin zingah a chenna, Chawnpui Veng, Aizawl-ah a bial chhung boxer pahnih hi thingpui inpuiin a lo intiam tawh angin lawmpuina leh chawimawi nan pawisa a pe a. A nupui Pi Hmingmawii'n super welterweight champion Hruaia kutah Rs 1,00,000 pein super lightweight final-a chak zo ta lo Ramfela'n Rs 50,000 a dawng ve thung.

Tuichang bialtu MLA Pu Tawna chuan Mizoram infiamna huanga lian ber pawl leh huhang ngah em em, Zoram mipuiin an ngaihhlut LPS Pro Fight-ah a bial chhung Chawngtlai boxer pahnih hlawhtlinna a lawmpui tak zet tih a sawi.

"Champion thei Hruaia thawh rimna a chhuanawm hle a, Ramfela'n a tum tipuitling zo lo mah se a khel a hmuhnawm a, a chhuawnawm a, in kal zelna turah duhsakna ka hlan a che u," a ti.

September 30 khan R Dengthuama Indoor Stadium, Mualpuiah final khelh a ni a, Hruaia'n round li an inhnek hnuah unanimous decision-in Khatla South boxer Zomuansanga a hneh.

Pro Fight champion a nih bakah professional boxing vawi nga a khelh tawhah a chak vek a, boxrec ranking-ah Indian boxer 54 zingah pakuana a ni zui nghal a ni.

2015 Pro Fight bantamweight champion Ramfela'n super light final-ah uiawm takin Khuangthing fighter Vanlalawmpuia a hneh lo va, professional boxing vawi nga a khelhna niin a tum khat nan a tlawm.

Mizo boxer langsar pahnih hi Chawngtlai Welfare Committee, Aizawl leh Khawzawl Welfare, Aizawl hruaituten an tawiawm a, Pu Tawna te chhungkaw chungah thinlung taka lawmthu an sawi bakah, pa nih tling, innghahna tlak a nihzia an sawi.